Сагата меѓу Ромелу Лукаку и Наполи доби драматичен и веројатно дефинитивен пресврт. Италијанскиот клуб денеска и официјално потврди дека започнува „соодветна дисциплинска постапка“ против белгискиот напаѓач, откако тој не се појави на денешниот тренинг на тимот.
Иако Лукаку се повлече од обврските со репрезентацијата на Белгија минатата недела поради наводна слаба физичка подготвеност, тој наместо да се врати во Неапол на рехабилитација, одлучи на своја рака да остане во својата татковина и да тренира индивидуално.
Остро соопштение од клубот: Лукаку е „замрзнат“
Наполи не губеше време и преку официјално соопштение ја информираше јавноста за непослушноста на својата ѕвезда.
„Наполи објавува дека Ромелу Лукаку не одговори на денешниот повик за продолжување на тренинзите. Клубот го задржува правото да ги процени дисциплинските мерки, како и натамошното учество на играчот во тимот на неодредено време“, стои во изјавата на „Партенопеите“.
Дали ова е крајот? Адвокатите веќе работат
Според информациите на „Sky Sport“, казната би можела да биде многу поригорозна од обична парична санкција. Адвокатите на Наполи веќе го чешлаат договорот на Белгиецот, а во опција е дури и целосен раскин на соработката доколку се утврди дека играчот сериозно ги прекршил професионалните обврски.
Ова доаѓа во најлош можен момент за тимот, бидејќи веднаш по репрезентативната пауза, на 6 април, Наполи го пречекува второпласираниот Милан во директна битка на стадионот „Диего Армандо Марадона“. Со оглед на моменталната ситуација, речиси е извесно дека Лукаку нема да биде во комбинација за овој дерби натпревар, а прашање е дали воопшто некогаш повторно ќе го облече синиот дрес.
