Лос Анџелес Лејкерс ја слават една од најважните ноќи во поновата историја на франшизата. Со победата над Кливленд Кавалирс од 127-113, тимот од „Градот на ангелите“ не само што ја продолжи победничката серија, туку беше сведок на уривање на еден од најголемите рекорди во НБА лигата.
Леброн Џејмс официјално стана кошаркарот со најмногу победи во историјата на НБА (регуларен дел и плејоф), запишувајќи го својот 1.229-ти триумф. Со ова, „Кралот“ го помина досегашниот рекордер Карим Абдул-Џабар, симболично правејќи го тоа токму во дресот на Лејкерс.
Дончиќ се врати со „оган“ во рацете
По принудната пауза од еден меч поради технички грешки, Лука Дончиќ се врати на паркетот посилен од кога било. Словенечкиот магионичар ги предводеше Лејкерси со монструозна партија од 42 поени и 12 асистенции, што беше негов 16-ти натпревар со 40+ поени оваа сезона.
Доминацијата на Лејкерс беше евидентна уште од втората четвртина, кога со одличен шут од игра (над 53%) направија двоцифрена предност која само растеше до крајот. Деандре Ејтон помогна со 18 поени и 9 скокови, додека славеникот Леброн Џејмс, и покрај проблемите со стапалото, придонесе со 14 поени во историската победа.
Двојно славје: Титула во дивизијата и втора 50-ка по ред
Ноќта стана уште подобра за Лејкерси пред самиот почеток на нивниот меч, кога по поразот на Феникс во Орландо, тимот и официјално ја обезбеди титулата во Пацифик дивизијата и место меѓу првите шест екипи на Западот за плејофот.
Ова е првпат по ерата на Коби Брајант (од 2007 до 2011 година) Лејкерси да врзат две сезони со најмалку 50 победи, со што потврдуваат дека се едни од главните фаворити за прстенот оваа година. Кај Кливленд, најдобар беше Џерет Ален со 18 поени, додека Џејмс Харден додаде 17 во своето враќање во родниот град.
