Менаџерот на Арсенал, Микел Артета, ги отфрли шпекулациите дека клубот намерно ги повлекол своите ѕвезди од меѓународните настапи за да ги одмори за финишот на сезоната. Дури 11 фудбалери на „топчиите“ беа принудени да ги откажат настапите за своите национални тимови во овој последен прозорец, што предизвика лавина коментари во англиската јавност.
Статистиката е фрапирачка: од вкупно 228 повикани премиерлигашки играчи минатиот месец, 23 го откажаа својот настап. Речиси половина од нив, точно 11, се членови на Арсенал.
„Имаме одлична комуникација со Тухел и останатите“
И покрај гласините дека Арсенал користи „лукава претпазливост“, Артета инсистира дека медицинскиот тим на клубот е во постојан контакт со селекторите, вклучувајќи го и новиот предводник на Англија, Томас Тухел.
„Имаме многу добри односи и комуникација со повеќето национални тимови, секако и со Томас Тухел. Секогаш сме биле искрени за состојбата на секој играч. Кога треба да соопштиме медицинска одлука, тоа е јасно. Нашите играчи се очајни да играат за своите земји и ние сме горди на тоа“, изјави Артета.
Кој сè „извиси“ од репрезентациите?
Листата на отсутни во Арсенал изгледаше како прв состав на еден европски гигант. Пред репрезентативната пауза, поради повреди отпаднаа Вилијам Салиба (зглоб), Габриел (колено), како и Мартин Одегард, Јуриен Тимбер, Еберечи Езе и Леандро Тросар.
Откако дел од играчите веќе се приклучија на своите селекции, дополнително се повлекоа Деклан Рајс, Букајо Сака, Нони Мадуеке, Мартин Зубименди и Пиеро Инкапие. Овој масовен егзодус на „топчиите“ од националните кампови ги подгреа сомнежите кај конкурентите во Премиер лигата.
Шпекулации пред ФА Купот: Кој ќе игра против Саутемптон?
Арсенал утре гостува кај Саутемптон во четвртфиналето на ФА Купот, а Артета вешто ги избегна одговорите на прашањето колку од „повредените“ одеднаш ќе бидат фит за настап.
„Ќе видите утре. Ќе ве оставам да шпекулирате, а потоа судете сами. Мораме да го изведеме најсилниот можен состав бидејќи сме на само два-три чекори од трофејот во ФА Купот, кој е многу важен за нас“, додаде шпанскиот стратег.
Потврдено е дека Езе сигурно ќе го пропушти натпреварот, додека Одегард и Тимбер се во конкуренција за враќање. Со оглед на тоа што Арсенал е лидер во Премиер лигата, секој потег на Артета е под лупа на јавноста, која веќе почна да го нарекува овој потег „мајсторски тактички маневар“ за зачувување на свежината на тимот.
