Денешната програма од 25. коло во Првата македонска фудбалска лига ни го носи пресметката меѓу Вардар и Македонија ЃП. На прв поглед, дуел на лидерот и тимот кој се бори да не потоне во втората лига, но во македонскиот фудбал историјата меѓу овие два клуба гарантира дека на „Арената“ никого не го чека лесна задача.
Натпреварот започнува во 15:30 часот, а за двата табора денеска постои само една опција – победа.
Вардар мора да покаже шампионски карактер
Да се биде лидер на табелата е чест, но и огромен товар. По неочекуваниот пораз во претходната рунда, „црвено-црните“ денеска немаат право на нов кикс доколку сакаат да го задржат приматот и да чекорат кон титулата која ја најавија уште на полусезоната. Избраниците на Вардар знаат дека на домашен терен се фаворити, но притисокот е на нивна страна – секој резултат освен три бода ќе биде чекор наназад во шампионската трка.
„Лавовите“ не се предаваат: Македонија ЃП оди на се или ништо
Од другата страна на теренот стои ранетата Македонија ЃП. Со само 23 бодови и на деветтата позиција, „лавовите“ се наоѓаат во опасната зона и секој натпревар за нив е како финале. Искусниот Филип Стојчевски јасно порача дека тимот од Ѓорче Петров нема намера да се предаде без борба.
„Никој не помислува на преселба во понизок ранг. Нема друга опција за нас освен борба до самиот крај. Македонија ЃП ќе се бори на секој меч, на секој терен и против секој противник, без разлика на името“, дециден е Стојчевски.
Што вели статистиката?
Вардар во овој дуел влегува со огромни 58 бодови, дури 35 повеќе од својот денешен противник. Сепак, мотивот кај „лавовите“ да направат сензација против лидерот и да ги зголемат шансите за прволигашки живот може да биде пресуден фактор за неизвесен натпревар.
Дали Вардар ќе се врати на победничките патеки или Македонија ЃП ќе го приреди изненадувањето на колото? Одговорот го добиваме попладнево на Националната Арена „Тодор Проески“.
