Емотивно збогување на Трипиер: „Овде се чувствував како дома, ќе ми недостигате!“

Првото и најважно засилување во новата ера на Њукасл Јунајтед си заминува од „Сент Џејмс Парк“. Англискиот десен бек, Киеран Трипиер (35), официјално потврди дека ќе го напушти клубот ова лето по истекот на неговиот договор.

Трипиер пристигна во Њукасл во јануари 2022 година од Атлетико Мадрид за сума од 12 милиони фунти. Тогаш клубот се бореше за опстанок во Премиер лигата, но неговото доаѓање како прво засилување по саудиското преземање на клубот беше јасен сигнал дека проектот е сериозен. Тој не само што помогна тимот да избори опстанок, туку стана капитен, лидер и клучен играч во враќањето на Њукасл во Лигата на шампионите и освојувањето на Карабао Купот минатата сезона, прв домашен трофеј за клубот по 70 години!

Емотивно збогување: „Ова е местото каде што се чувствував најмногу како дома“

Во емотивното видео објавено на официјалните канали на клубот, Трипиер им се заблагодари на навивачите, соиграчите и стручниот штаб.

„Дојде време да го напуштам овој неверојатен клуб по четири и пол години. Ова е местото каде што се чувствував најмногу како дома. Емотивно е и навистина ќе ми недостига сето ова. Сакам да им кажам огромно благодарам на навивачите за поддршката и во добрите и во лошите моменти. Секогаш бевте тука за мене,“ изјави Трипиер.

Thank you, Tripps 🖤🤍

After four and a half years of incredible service to Newcastle United, we can confirm that Kieran Trippier will leave the club this summer when his contract expires.

Kieran arrived in January 2022 with the club in the relegation zone and played a crucial… pic.twitter.com/Qp36O3BZKd

— Newcastle United (@NUFC) April 4, 2026

Легендата на клубот, Алан Ширер, реагираше со кратко и јасно: „Ти благодариме, Трипс“, додека косопственикот Џејми Рубен истакна дека Трипиер бил „инспиративен лидер кој дошол во клубот кога многумина други не сакале.“

Што е следно за Трипиер?

Иако наполни 35 години, Трипиер се уште има желба за редовен првотимски фудбал. Со оглед на тоа што во Њукасл го загуби загарантираното место во стартните 11 (кога сите се здрави), јасно е дека бара клуб каде ќе може да игра почесто, а не да седи на клупата.

Навивачите на Њукасл засекогаш ќе го паметат како човекот кој ја отвори вратата за новата успешна ера на клубот. Фановите ќе имаат можност да се збогуваат со него на последниот домашен натпревар против Вест Хем на 17-ти мај.

Следете нè: Facebook | Instagram | X