Екипата на Пелистер приреди вистинска сензација во 25. коло од ПМФЛ, откако на гостувањето во Тетово ја совлада Шкендија со 1:2 (1:1). Со овој неочекуван триумф на дебито на старо-новиот тренер Марјан Секуловски, битолчани освоија огромни три бода во битката за опстанок, додека на Шкендија ѝ приредија тежок удар во шампионската трка со Вардар.
Спировски шокираше, Ибраими брзо врати
Натпреварот започна со иницијатива на Шкендија, но мрежите мируваа сè до 36. минута. Тогаш следуваше вистински шок за домашните навивачи, по одлична акција и асистенција на Булатовиќ, Стефан Спировски од прва го матираше Гаје за водство на Пелистер од 0:1.
Интересно, исто како и на нивната претходна пресметка во Тетово пред пет кола, радоста на битолчани траеше кратко. Пред самиот крај на полувремето (43′), Бесарт Ибраими доби топка од Зејнулаи и со прецизен удар во долниот лев агол израмни на 1:1.
Јовчевски спушти ролетна, Керим пресуди во финишот
Второто полувреме помина во знакот на Шкендија и нејзините пропуштени шанси, пред сè благодарение на брилијантниот голман на Пелистер, Андреј Јовчевски. Тој во два наврати феноменално ги скроти ударите на Тамба, а Ибраими промаши две чисти ситуации од непосредна близина.
И кога сите очекуваа судијата да отсвири крај и поделба на бодовите, следеше казната. Во 93. минута, резервистот Вилдан Керим доби одлична топка од Ристовски во шеснаесетникот и со прецизен удар откосо му донесе огромна победа на Пелистер од 1:2.
Со овој пораз (прв по 10 натпревари), Шкендија останува на 58 бодови и му дозволи на Вардар да се одлепи на врвот, додека Пелистер со 25 бодови направи крупен чекор кон обезбедување прволигашки статус и следната сезона.
