Фудбалот понекогаш ги пишува најневеројатните и најемотивните приказни, а последната доаѓа од Колумбија, со легендарниот напаѓач Хуго Родалега во главната улога. Поранешниот ас на Виган и Фулам, на 39-годишна возраст, помина пат од агонија и солзи до херојска екстаза за само неколку минути, постигнувајќи го голот за шампионска титула на својот тим, Индепендиенте Санта Фе.
Драмата се случуваше во финишот на реванш-финалето од колумбискиот шампионат против Индепендиенте Меделин. При резултат 1:1, на десетина минути пред крајот, Родалега се здоби со повреда и беше виден како плаче на теренот, покривајќи го лицето со дресот, очигледно во големи болки. Сцените беа емотивни – соиграчите и противниците го тешеа, а се чинеше дека неговиот настап е завршен.
Но, тогаш се случи моментот за историја. И покрај тоа што едвај се движеше и видливо куцаше, ветеранот одби да се предаде и остана напред. Неговиот соиграч Едвард Лопез направи одличен продор по десната страна и ја испрати топката во срцето на шеснаесетникот, каде што налета токму Родалега. Со еден допир, тој ја смести топката во мрежата за водство од 2:1 и за титула!
Прославата беше слика на целата ситуација – Родалега почна да скока на една нога пред да падне на земја, каде што беше преплавен од своите соиграчи. Веднаш потоа, во 83-та минута, беше заменет.
39 year old Hugo Rodallega (Wigan legend) got injured during Independiente Santa Fe’s Colombian league final.
He played through the pain and seconds later, scored a goal while hobbling on one foot.
2-1 was the final score. League winner. Legendary. pic.twitter.com/7191746xQK
— EiF (@EiFSoccer) June 30, 2025
Она што ја прави приказната уште поинтересна е неговата изјава по натпреварот.
„Реков дека ако станеме шампиони, ќе се пензионирам. Но, мојот син ми вели да продолжам да се борам, а сигурно и сите други ќе ми го кажат истото“, изјави Родалега, оставајќи ја својата иднина отворена.
Навивачите во Англија го паметат Родалега како „култен херој“ од Премиер лигата, каде што со 24 гола сè уште е најдобар стрелец во историјата на Виган во елитното натпреварување. Сепак, овој погодок, постигнат во болка за шампионска титула, веројатно ќе остане најдраматичниот и најблескавиот момент во неговата долга и богата кариера.
