Серијата од пет последователни победи на Наполи во Серија А беше прекината таму каде што најмалку се очекуваше. Тимот на Антонио Конте одигра само 1-1 на гостувањето кај Парма, резултат кој сериозно ги загрозува нивните амбиции за титулата. „Пармезаните“ по третпат по ред успеваат да го сопрат Наполи, потврдувајќи дека се вистинска „црна мачка“ за тимот од подножјето на Везув.
Шок по само 33 секунди игра
Натпреварот започна со вистински „ладен туш“ за гостите. По само 33 секунди игра, Габриел Стрефеца го искористи одличното проигрување од Неста Елфеж и со прецизен удар со десната нога ја погоди мрежата на Милинковиќ-Савиќ за водство на Парма од 1-0.
Наполи, кој на овој меч настапи без неколку клучни играчи како Лукаку, Ди Лоренцо и Рахмани, се мачеше да создаде чиста шанса во првото полувреме. Кевин Де Брујне се обидуваше да ги диктира нештата од средината, но бедемот на Парма, предводен од голманот Сузуки, беше речиси непробоен.
Мактоминеј повторно во улога на спасител
Притисокот на Наполи вроди со плод во 60-тата минута. По една брза акција, Станислав Лоботка го пронајде Расмус Хојлунд, кој само ја одложи топката до Скот Мактоминеј. Шкотланѓанецот со силен удар од работ на шеснаесетникот го израмни резултатот, постигнувајќи го својот нов важен погодок во дресот на „партенопеите“.
Сепак, ниту влегувањето на Елиф Елмас во финишот не го промени исходот. Македонскиот репрезентативец имаше одлична шанса да донесе победа, но неговиот удар со глава по центаршутот на Гутиерез заврши над пречката.
Сузуки ги сопре сите налети
Голманот на Парма, Зион Сузуки, беше вистински херој во судиското продолжение, запирајќи ги ударите на Алисон Сантос и атрактивниот обид со „ножички“ на Мактоминеј. Наполи доминираше во поседот на топка (74%), но недостатокот на креативност во завршницата значеше губење на два драгоцени бода во трката со Интер за врвот.
