Дека доминацијата на Баерн Минхен во Бундеслигата е без преседан, најдобро потврдува најновата вест од Германија. Славниот шампионски пехар, популарно наречен „Meisterschale“ или „салатара“, едноставно остана без место за гравирање на името на новиот шампион.
Поради тоа, ДФЛ (Германската фудбалска лига) мораше да нарача итна модификација на трофејот, кој сега е поголем и потежок од кога било досега.
Просторот е обезбеден до 2056 година
Бидејќи името на Баерн Минхен се појавуваше премногу често во последната деценија, на сребрениот штит му беше додаден нов, поширок надворешен прстен. Наместо досегашните три линии за гравирање, новиот прстен има вкупно пет линии, со што се обезбедува простор за имињата на шампионите во следните 30 години, поточно до сезоната 2055/56.
Оваа трансформација ја изврши познатата златарница „Koch & Bergfeld“. Пехарот беше целосно расклопен, реставриран и зголемен. Новата „салатара“ сега има дијаметар од 56 сантиметри и тежи над 11 килограми, што значи дека Хари Кејн и Ким Мин-јае ќе треба добро да ги затегнат мускулите кога ќе го креваат трофејот на 16 мај.
O troféu da Bundesliga foi aumentado e já tem espaço para os próximos 30 anos. pic.twitter.com/g9f6ctchVR
— B24 (@B24PT) April 15, 2026
Традиција стара 77 години
Овој легендарен трофеј е создаден во 1949 година како замена за изгубената статуетка „Викторија“. На него се изгравирани имињата на сите германски шампиони уште од далечната 1903 година. Дизајниран од Елизабет Трескоу, пехарот е украсен со 71,98 карати турмалин.
Интересно е што ова е трето „проширување“ на трофејот во историјата, откако претходните две се случија во 1981 и 2009 година, секогаш поради истиот „проблем“: премногу шампиони, а малку место.
Кога ќе биде крунисан Баерн?
Баерн моментално има 76 бодови по 29 натпревари, дури 12 повеќе од Борусија Дортмунд. Доколку Дортмунд киксне против Хофенхајм на 19 април, а Баерн го победи Штутгарт на 20 април, 35-тата титула ќе биде и официјално потврдена. Сепак, официјалното доделување на новиот, „екстра-ларџ“ трофеј ќе се случи на последното коло, на 16 мај, по натпреварот против Келн на „Алијанц Арената“.
