Кога ќе се спомене името на Јирген Клоп и неговите 489 натпревари на клупата на Ливерпул, сите веднаш ќе помислат на враќањето на шампионскиот дух, на титулата од Премиер лигата во 2020 година, или триумфот во Лигата на шампионите една сезона претходно. Но, ретко кој ќе се сети на мрежите на головите на Енфилд.
Иако изгледа како неважен детаљ, токму оваа ситна промена можеби имаше своја улога во тоа Ливерпул да стане европски и англиски шампион по долги години.
Кога Германецот беше именуван за тренер во октомври 2015 година, наследувајќи го Брендан Роџерс, му требаше помалку од една година за да донесе една интересна одлука – мрежите на Енфилд да бидат бели, наместо традиционалната црвена боја.
Never realised that Rodgers re-introduced red nets at Anfield in 2012 before Klopp removed them again in 2016. Turns out it’s banned now anyway. pic.twitter.com/jtXdjqDvUi
— James. (@afcjxmes) January 22, 2025
Зошто Клоп инсистираше на бели мрежи?
Сезоната кога беше отворена новата трибина на Енфилд, атмосферата во клубот беше на ниво, а фановите гордо го славеа растот на Ливерпул и враќањето на амбицијата.
Но, некои внимателни навивачи забележаа – мрежите на головите не беа црвени како досега, туку бели. Само неколку дена претходно, на тренингот на првиот тим, мрежите беа црвени. До натпреварот со Лестер, сè се смени, а Ливерпул ја славеше победата од 4:1.
Причината? Клоп, познат како перфекционист и психолог на теренот, веруваше дека белите мрежи ќе бидат повидливи за фудбалерите во текот на играта. Со оглед на тоа дека речиси цел стадион е облечен во црвено, црвените мрежи се губат во позадината. Белата боја, пак, полесно го “фаќа окото” и потенцијално носи повеќе голови.
Историјата го памети Луис Суарез кој ги постигна своите 40 од 42 гола на Енфилд токму со бели мрежи, а спектаклот со Борусија Дортмунд во Лигата на Европа исто така се одигра со тие мрежи на теренот. Случајност? Тешко.
Како дојде до црвените мрежи?
Интересно е што токму Брендан Роџерс, пред да биде сменет од Клоп, ги врати црвените мрежи во 2012 година. Роџерс, кој од мали нозе го следел Ливерпул, се сеќаваше на славните 80-ти и на тогашните црвени мрежи како симбол на клубот.
Кога ја презеде клупата, побара тие мрежи да се вратат, заедно со легендарниот натпис “This is Anfield”, кој исто така беше тргнат во 1998 година, па повторно поставен од страна на Роџерс.
Но, што се случи со старите мрежи? Наместо да завршат на отпад, клубот великодушно ги донираше на рагби клубот Сент Хеленс, кој во тие години доминираше со четири титули во низа.
Така, дел од славната историја на Енфилд и натаму живее, но веќе во друг спорт.
На крајот на денот, ситниците прават разлика
Бели или црвени мрежи – можеби за обичен фан тоа изгледа неважно, но за Клоп и неговата филозофија за перфекција, секој детаљ е битен. И токму тие детали го вратија Ливерпул на врвот на европскиот и светскиот фудбал.
