Вечерта во НБА лигата донесе возбудливи натпревари на двата краја од САД. Минесота Тимбервулвс успеаја да го „украдат“ првиот меч во Сан Антонио, додека Њујорк Никс продолжија со застрашувачката форма која веќе ги сместува во историските книги на лигата.
Минесота го преживеа историскиот Виктор Вембањама
Минесота Тимбервулфс поведоа со 1-0 во полуфиналето на Западот по тесната победа од 104-102 против Сан Антонио Спарс. Клучната вест за „волците“ беше неочекуваното враќање на нивниот најдобар играч, Ентони Едвардс, кој поради повреда на коленото требаше да ги пропушти првите два натпревари. Едвардс, иако со ограничена минутажа, постигна 18 поени, од кои дури 11 беа во одлучувачката четврта четвртина.
Најдобар стрелец кај победниците беше Џулиус Рендл со „дабл-дабл“ од 21 поен и 10 скока. Од друга страна, Виктор Вембањама одигра натпревар за историја, поставувајќи нов НБА плејоф рекорд со неверојатни 12 блокади. Тој стана само третиот играч во историјата со плејоф „трипл-дабл“ што вклучува блокади. Сепак, неговите 11 поени и 15 скока не беа доволни за триумф, бидејќи Џулијан Шампани го промаши шутот за тројка со звукот на сирената.
Историска доминација на Њујорк Никс
Њујорк Никс го декласираа тимот на Филаделфија 76ерс со 137-98, со што поведоа со 1-0 во полуфиналето на Источната конференција. Никс станаа првиот тим во историјата на НБА кој победил на три последователни плејоф натпревари со разлика од најмалку 25 поени. Дополнително, тие се првиот тим од сезоната 1996-97 кој во три врзани плејоф натпревари имал водство од над 30 поени.
Џејлен Брансон повторно беше незапирлив, постигнувајќи 35 поени (од кои 27 во првото полувреме), додека Оџи Ануноби додаде 18 поени. Кај Филаделфија, која делуваше исцрпено по камбекот против Бостон, Џоел Ембиид постигна само 14 поени со слаб шут од игра (3/11), додека Пол Џорџ беше најефикасен со 17 поени.
