Еуфоријата по враќањето на ракометната круна во Скопје не стивнува. По убедливиот триумф над Еурофарм Пелистер, со кој Вардар 1961 и математички ја завери својата 16-та титула, стратегот Иван Чупиќ не го криеше задоволството од остварувањето на долгоочекуваната цел и обединувањето на двојната круна во македонскиот ракомет.
За хрватскиот стручњак, кој ја презеде одговорноста да го води тимот во оваа транзициска сезона, начинот на кој е освоен пехарот е посебен. Чупиќ истакна дека не постои подобро сценарио од тоа титулата да се прослави по победа во најголемото дерби, пред преполна сала и во автентичен вардаров амбиент.
„Во ваков амбиент, со главниот ривал, во најголемото македонско дерби да завршиш работа и да освоиш титула, не можевме да посакаме подобро. Маратонот беше долг, но мислам дека заслужено ја вративме титулата во Скопје“, изјави Чупиќ, упатувајќи благодарност до раководството за довербата да биде тренер во, како што вели, овој многу голем клуб.
Тој не заборави да ги спомене и играчите кои го почнаа патот, но не ја дочекаа завршницата во црвено-црниот дрес, како Талески, Борозан и Ќосевски, потенцирајќи дека ова е голем ден за сите навивачи на Вардар.
Георгиевски: Го избришавме притисокот од минатата година
Искусното крило Гоце Георгиевски призна дека тимот носел огромен товар по загубениот пехар минатата сезона. Според него, доминацијата покажана годинава е вистински одговор на сите притисоци. Со освоениот Куп, титулата во Суперлигата и четвртфиналето во Европската лига, зад Вардар е една исклучително успешна сезона во која се исполнети речиси сите зацртани цели.
Малус: Нашата тврдина остана неосвоена
Јака Малус, една од клучните алки во машината на Чупиќ, го истакна фактот дека СЦ „Јане Сандански“ остана неосвоена тврдина оваа сезона. Словенецот верува дека ова е само почеток на убави нешта кои доаѓаат за клубот во наредната година.
„Кога имаме навивачи на трибините, сè е можно. Немаме пораз дома и тоа е нашата гордост“, порача Малус.
Вардар по тригодишна пауза повторно е на врвот, докажувајќи дека и во тешки моменти, шампионскиот ген на овој клуб останува недопрен.
