По драматичните вести за физичка пресметка во соблекувалната на Реал Мадрид, Федерико Валверде упати официјално соопштение до јавноста во кое ја објаснува својата верзија за настаните. Уругваецот не го крие разочарувањето од актуелната состојба во клубот и признава дека тензиите се резултат на наталожените неуспеси во текот на годината.
„Вчера имав инцидент со соиграч за време на тренинг. Заморот од натпреварувањата и фрустрацијата направија сè да изгледа преувеличено“, ја започнува својата исповед Валверде. Тој смета дека во нормална соблекувална вакви работи се случуваат и вообичаено се решаваат внатрешно, без да станат јавни. „Јасно е дека некој овде шири гласини, а со сезона без титули, каде Реал Мадрид е секогаш под лупа, сè се пренагласува“, додава играчот за врска на „кралевите“.
Незгода по вербална расправија
Уругваецот детално појасни како дошло до повредата на главата, негирајќи дека бил физички нападнат од соиграч. „Денес имавме уште едно несогласување. За време на расправијата, случајно удрив во маса, што предизвика мала посекотина на челото за која беше потребна рутинска посета на болница“, објаснува Валверде, нагласувајќи дека во ниту еден момент не дошло до физички контакт: „Ниту соиграчот ме удри, ниту јас го удрив него“.
Валверде признава дека емоциите го совладале поради тешкиот период низ кој поминува тимот. „Чувствувам дека мојот бес поради ситуацијата и фрустрацијата што гледам како некои од нас се мачат да ја истуркаат сезоната до крај, давајќи го максимумот, ме турна до точка на расправија со соиграч“, искрен е тој.
Болка поради пропуштањето на „Ел Класико“
Најголемиот удар за Валверде е фактот што лекарската забрана ќе го спречи да му помогне на тимот во претстојното дерби. „Жал ми е. Навистина ми е жал бидејќи оваа ситуација ме боли, а овој момент низ кој поминуваме е болен. Реал Мадрид е една од најважните работи во мојот живот и не можам да бидам рамнодушен кон тоа“, вели Уругваецот. Тој додава дека овој инцидент е акумулација на нешта кои кулминирале во бесмислена кавга, што го оштетува неговиот имиџ.
Валверде објасни дека првично планирал да не зборува до крајот на сезоната бидејќи гневот по елиминацијата од Лигата на шампионите го чувал во себе. „Потрошивме уште една година и не бев во позиција да објавувам на социјалните мрежи кога единственото лице што требаше да го покажам беше на теренот. Затоа сум најмногу тажен и повреден што поминувам низ оваа ситуација која ме спречува да играм на следниот натпревар поради медицински одлуки“, истакнува Валверде.
На крајот, тој потенцираше дека секогаш го давал својот максимум и дека му е на располагање на клубот за каква било понатамошна одлука.
