Манчестер Сити уште еднаш покажа зошто е шампион кој никогаш не престанува да верува. По фрустрирачките деведесет минути против Евертон каде „граѓаните“ прокоцкаа сè, денеска на „Етихад“ видовме поинаква слика. Иако Брентфорд се покажа како „тврд орев“ кој го мачеше домаќинот во првиот дел, Пеп Гвардиола знаеше како да го пронајде клучот. Со три гола во второто полувреме, Сити го сопре налетот на „пчелите“ и се доближи на само два бода до врвот, но вистинското шоу почна по последниот свиреж.
На прес-конференцијата, Гвардиола не само што го анализираше мечот, туку испрати порака која веднаш стана вирална. Со навивачкиот крик на Вест Хем, „COME ON YOU IRONS!“, Шпанецот ги фрли ракавиците кон Лондон. Тој искрено призна дека по киксот со Евертон, контролата веќе не е кај нив, па сега Сити е во несекојдневна позиција – да седи пред телевизор и да навива за „чеканите“ да му откинат бодови на Арсенал.
Гвардиола: „Наше е да чекаме“
Сепак, тој даде изјава за Премиер лигата, така што не останавме без анализата на каталонскиот стратег. Искусниот стратег беше брутално искрен кога станува збор за трката за трофејот, свесен дека патот до триумфот од 3-0 беше трнлив.
„Беше во наши раце, сега веќе не е. Не бевме совршени против Евертон, но денес се вративме. Во среда против Кристал Палас ќе се обидеме да си ја завршиме работата и ќе чекаме. Натпреварот со Евертон беше вистински доказ – губевме 1-3, одигравме неверојатно прво полувреме, но го испуштивме натпреварот. Тоа е фудбал. Се случува, поентата е како реагирате на тоа, а јас сум навистина задоволен од начинот на кој го направивме тоа денес“.
Гвардиола не штедеше пофалби ниту за противникот, нагласувајќи дека Брентфорд е еден од најтешките тимови за „кршење“ во Премиер лигата.
„Брентфорд се навистина, навистина тешки противници, сезоната го докажа тоа – транзициите, прекините, аут-фрлањата. Страдавме во првите минути, но после тоа одигравме навистина добар натпревар по левата страна во првиот дел, а по двете страни во второто полувреме. Ставивме повеќе играчи во шеснаесетникот по паузата, во првиот дел тоа не беше случај и затоа страдавме со завршниот производ. На крајот, одличен резултат и продолжуваме понатаму“.
Џереми Доку: „Финален производ“ на Гвардиола
Ако некој го украде вниманието на теренот, тоа дефинитивно беше Џереми Доку. Младиот Белгиец изгледаше како незапирлив мотор на левата страна, а Гвардиола не штедеше зборови за неговиот напредок, истакнувајќи дека тој веќе почнува да ја дефинира својата улога како клучен играч.
„Изгледа како финален производ веќе сега, иако секако дека може да се подобри. Секогаш ја имаше таа неверојатна способност за дриблинг и за правење акции и конекции, тоа е извонредно. Но, сега се работи за победување натпревари. Неверојатно сум задоволен што имам момче кое носи таква енергија и кое знае да постигнува голови“.
Со ваков Доку и разбуден Халанд, Сити ја продолжува својата импресивна домашна серија, а притисокот сега е целосно на страната на „топчиите“.
