По неочекуваниот минатонеделен кикс и домашниот пораз од Болоња, фудбалерите на Наполи немаа право на нова грешка. Избраниците на тимот од под Везув одиграа супериорен и зрел натпревар на гостински терен кај Пиза, славејќи со убедливи 3-0, со што и официјално го заверија својот пласман во Лигата на шампионите за следната натпреварувачка сезона.
„Партенопеите“ со овој триумф го тргнаа огромниот притисок од своите плеќи, а навивачите конечно можат да здивнат и да почнат да се подготвуваат за елитното европско друштво.
Магијата на Елмас го скрши отпорот на домаќините
Наполи беше сериозно ослабен на ова гостување. Клучниот играч од средниот ред Кевин Де Брујне, поради повреда на главата заработена на тренинг, мораше да остане на клупата со конци, Ромелу Лукаку го пропушти мечот поради повреда, додека Матео Политано ја одлежуваше својата суспензија.
Сепак, во отсуство на првите ѕвезди, одговорноста ја презеде македонскиот репрезентативец Елиф Елмас, кој одигра фантастичен натпревар. Наполи уште од самиот старт наметна нестварен ритам, имајќи дури 80% посед на топката во воведните дваесетина минути. Иницијативата вроди со плод кога Скот Мектоминеј со прецизен приземен удар од работ на шеснаесеттникот, по земја, погоди од внатрешниот дел на стативата за 1-0.
Само неколку минути подоцна на сцена стапи нашиот „дијамант“. Елмас перфектно изведе еден корнер, пронаоѓајќи го Амир Рахмани, кој со силен удар со глава ја испрати топката зад гол-линијата на Шемпер пред тој да успее да интервенира. Со сигурни 2-0 пред паузата, Наполи веќе го имаше натпреварот во свои раце.
Хојлунд го скрши голгетерскиот пост за конечен триумф
Во второто полувреме, Пиза се обиде да направи притисок и да постигне брз погодок за враќање во натпреварот. Домашните фудбалери креираа неколку опасни ситуации, но голманот Алекс Мерет беше на висина на задачата со две клучни интервенции, најпрво по големата грешка на Бунџорно, а потоа и при обидот на Морео.
Точка на сите дилеми околу победникот и потврда на шампионскиот билет стави Расмус Хојлунд. Данскиот напаѓач, кој се соочуваше со едномесечен голгетерски пост, се најде на вистинското место во шеснаесетникот по одличниот низок центаршут на Пасквале Мацоки и рутински ги постави конечните 3-0.
Со оваа победа Наполи ја заврши својата примарна мисија и во последното коло ќе влезе целосно растеретен, додека Пиза ќе мора да ги бара бодовите за спас на друго место.
