Сезоната 2025/26 на Апенините помина во знак на апсолутна доминација на Интер, а круната на двојната круна (Скудетото и Копа Италија) пристигна со официјалното доделување на индивидуалните признанија од страна на Лега Серија А. За најдобар фудбалер (МВП) на шампионатот е прогласен Федерико Димарко. Левиот бек на „нераѕурите“ испиша нова страница во италијанската фудбалска историја, станувајќи првиот дефанзивец кој го подигнал ова престижно сезонско признание.
Магијата на левото стопало и уривање на историскиот рекорд за асистенции
Признанието за Димарко не е плод на субјективен впечаток, туку резултат на софистицирана напредна аналитика на компанијата „Кама Спорт“ и трекинг-системот „Хок-ај“ (Hawk-Eye). Овој систем ги следеше сите движења со и без топка, ефикасноста во донесувањето одлуки на теренот и физичкиот придонес за тимот.
А бројките на италијанскиот репрезентативец се едноставно спектакуларни: 6 гола и дури 18 асистенции во Серија А. Со вкупно 24 директни учества во головите, Димарко ја заврши шампионската кампања како апсолутен лидер по креирани шанси. Неговите 18 асистенции се нов историски рекорд за најмногу дедовни пасуви во една сезона во италијанската елита.
„Димарко покажа супериорен технички квалитет. Неговото извонредно лево стопало донесе емоции и бројки кои никогаш претходно не биле забележани во нашиот шампионат“, потенцираше првиот човек на Серија А, Луиџи Де Сиерво.
Киву чекори по стапките на Мурињо, Лаутаро без конкуренција
Дека Интер ја одигра најзрелата клупска кампања потврдуваат и останатите клучни награди кои завршија во Милано. Лаутаро Мартинез очекувано ја понесе наградата за најдобар напаѓач во лигата, додека Кристијан Киву е прогласен за тренер на годината.
Романскиот стратег, кој имаше победнички менталитет и како играч, успеа да го донесе Интер до 21-то Скудето со просек од над два постигнати гола по натпревар. На Киву му беа потребни само 48 натпревари на клупата во Серија А за да стане шампион на Италија – во ерата кога се доделуваат три бода за победа, побрз од него во ова остварување беше единствено Жозе Мурињо.
Младата крв на Апенините: Свилар, Јилдиз, Палестра и Паз со вредни признанија
Иако Интер ги собра главните парчиња од индивидуалниот колач, Серија А промовираше сериозен бран на млади таленти, со оглед на тоа што дури тројца наградени играчи се под 22 години.
Наградата „Ѕвезда во подем“ замина во рацете на турскиот офанзивец Кенан Јилдиз, што претставува сериозна потврда за вербата на Јувентус во неговиот потенцијал по една прилично турбулентна сезона за тимот од Торино. Миле Свилар заслужено го понесе признанието за најдобар голман по фантастичните и константни партии на голот на Рома.
Најдобар дефанзивец на годината е младиот Марко Палестра (кој блесна во Калјари како позајмен играч од Аталанта), статус кој веднаш го вклучи алармот кај големите клубови, вклучувајќи го и Интер, кои летово ќе трчаат по неговиот потпис. За најдобар играч од средниот ред е избран Нико Паз, креативецот кој со своите нестварни партии во Комо го принуди Ческ Фабрегас јавно да порача дека Аргентинецот или ќе остане во клубот или ќе се врати директно во Реал Мадрид.
