Фудбалската сезона во англиската Премиер лига секогаш носи неверојатни возбудувања, но и безброј дебати за судиските одлуки кои директно влијаат врз конечниот исход на табелата. Ексклузивната детална анализа на поранешниот премиерлигашки судија Грем Скот за „The Athletic“, базирана на официјалните неделни извештаи на независната комисија составена од поранешни фудбалери (КМИ), открива шокантни пресврти во елитниот англиски фудбал.
Доколку сите очигледни судиски грешки на теренот и погрешните ВАР интервенции беа навремено и точно коригирани, трката за шампионската титула ќе имаше сосем поинаков тек, а Манчестер Сити ќе влезеше во последниот круг со два бода предност пред Арсенал.
Најголемите профитери и трагичари: Фулам сурово избришан од Европа
Конечната комисиска статистика покажува дека мал број клубови можат исклучиво судиите да ги сметаат за виновни за својот краен пласман, но неколку тима имаа огромен „ветар во грб“. Најголеми профитери од судиските превиди се Арсенал, Челси и Сандерленд, кои според официјалните анализи во своите витрини инкасирале по дури четири бода повеќе отколку што реално заслужиле на зелениот терен.
На спротивната страна, најсурово оштетен тим е Борнмут, кој останал пократок за четири бода. Веднаш зад нив е тимот на Фулам, кој поради три изгубени бода директно останал без историски пласман во Лигата на Европа, место кое на крајот заврши кај Сандерленд. Сепак, кога станува збор за дното на табелата, правдата останува непроменета бидејќи реалноста покажува дека истите три тима неминовно би испаднале од елитата. Единствениот клуб каде грешките во текот на целата година совршено се компензирале и израмниле е Њукасл Јунајтед.
Како Арсенал „профитираше“, а Манчестер Сити беше сопрен кон врвот
Актуелниот шампион Арсенал дефинитивно ги имаше симпатиите на судиите во три клучни натпревари кои на крајот ги доби со само еден гол разлика, а во кои комисијата утврди дека морало да бидат досудени пенали против нив. Ова ги вклучува ситуациите каде Вилијам Салиба брутално го собори Тиерно Бари од Евертон, играњето со рака на Деклан Рајс во шеснаесеттникот против Челси, како и инцидентот во кој Габриел Мартинели буквално го повлече на земја Матс Вифер на дуелот против Брајтон. Единствениот минус за „Топчиите“ беше признаениот гол од офсајд на Трево Чалоба за Челси во ремито од 1-1.
Манчестер Сити, од друга страна, има сериозна причина за револт. Во големото градско дерби кое го загубија со 2-0 од Манчестер Јунајтед, Диого Далот мораше да заработи директен црвен картон уште во 10-та минута по бруталниот старт над Џереми Доку. Дополнително, на тимот на Пеп Гвардиола му беше скратен чист пенал на гостувањето против Њукасл кога Фабијан Шер го собори Фил Фоден. Иако Сити имаше среќа кога Рубен Дијаш избегна исклучување против Форест, нивниот краен биланс е чист минус од два клучни бода кои ја одлучија лидерската позиција.
Судиски страв од одговорност и луди аномалии на теренот
Податоците од КМИ комисијата потврдуваат една болна вистина во модерниот фудбал: главните судии на теренот сè почесто се плашат да донесат големи одлуки, свесно потпирајќи се на сигурносната мрежа наречена ВАР. Според официјалниот записник, во текот на сезоната морало да бидат досудени дополнителни 17 црвени картони и дури 36 најстроги казни директно од арбитрите на теренот.
Забележан е и сериозен притисок од домашната публика, со оглед на тоа што на домаќините им биле досудени 45 пенали наспроти 35 за гостите, иако реалниот сооднос според правилата морал да биде егал – 58 наспроти 58. Аномалиите во Премиер лигата одат до тотални крајности. На натпреварите на Челси биле досудени скромни 6 пенали, иако комисијата пресмета дека реалната бројка требало да изнесува 16. Најлудо помина тимот на Брентфорд, кој во текот на сезоната успеа да биде вклучен во инциденти за неверојатни 24 пенали, додека Астон Вила се најде на сосем спротивната страна со само 3 такви ситуации.
