Шкотскиот капитен и досегашна легенда на Ливерпул, Енди Робертсон, официјално е нов фудбалер на Тотенхем. По неколкумесечни шпекулации, искусниот 32-годишен лев бек пристигнува во Лондон како слободен агент по истекот на неговиот договор на „Енфилд“. Тотенхем експресно ја искористи шансата и го засили својот состав со докажан победник, веднаш штом во драматичното последно коло и официјално обезбеди опстанок во Премиер лигата со победата од 1-0 над Евертон.
Andy Robertson, welcome to our family 🤍 pic.twitter.com/wK9w11nGYJ
— Tottenham Hotspur (@SpursOfficial) June 5, 2026
Де Зерби конечно го доби својот човек по јануарската рампа
Преминувањето на Робертсон во таборот на Спарси не е случајно. Клубот се обиде да го ангажира Шкотланѓанецот уште во јануарскиот преоден рок за да му ги исполни желбите на тогашниот менаџер Томас Френк, но Ливерпул тогаш стави вето и одби да дозволи трансфер на средина од сезоната. Сепак, Тотенхем остана упорен, а новиот шеф на стручниот штаб, Роберто Де Зерби, не го криеше своето воодушевување од финализирањето на зделката.
„Енди е фудбалер на кого му се восхитувам со години. Тој ќе донесе извонредни технички квалитети, огромно искуство, лидерство и победнички менталитет во нашиот тим. Тој е докажан победник на највисоко ниво и ќе биде клучен играч за нас, како на теренот, така и надвор од него“, изјави Де Зерби.
За Тотенхем ова е клучен потег во дефанзивата, особено ако се земе предвид дека Дестини Удоги во изминатите две сезони постојано мачеше мака со тешки повреди на колената и задната ложа. Џед Спенс принудно го покриваше левиот бек иако природно игра на десната страна, па со доаѓањето на Робертсон, тимот сега има врвна конкуренција покрај 19-годишниот талент Соуза. Тотенхем планира комплетна реконструкција на одбраната, со оглед на тоа што капитенот Кристијан Ромеро е пред заминување, Маркос Сенеси веќе доаѓа од Борнмут, а испратена е и официјална понуда за дефанзивецот на Брајтон, Јан Пол ван Хеке.
Крај на една ера: Заминување на легендата од „Енфилд“
Со овој трансфер официјално се става крај на една од најромантичните и најуспешните приказни во поновата историја на Ливерпул. Робертсон пристигна на „Енфилд“ во 2017 година од Хал Сити и во текот на девет незаборавни сезони одигра 378 натпревари, постигнувајќи 14 голови и дури 69 асистенции. Заедно со Трент Александер-Арнолд, тој целосно ја редефинираше улогата на бековите во модерниот фудбал.
Шкотскиот дефанзивец освои сè што можеше да се освои со „црвените“: Лигата на шампионите, две титули во Премиер лигата (вклучувајќи ја и последната во 2025 година), ФА Купот, два Карабао купа, УЕФА Суперкупот и Светското клупско првенство. Навивачите вечно ќе го памтат по неговиот луд, неуморен пресинг против Манчестер Сити во 2018 година, како и по моментот кога влезе под кожа на Лионел Меси во легендарниот пресврт од 4-0 против Барселона во 2019 година.
Сепак, последната сезона (2025/26) донесе промена на генерациите, па Робертсон ја загуби стартната позиција од Милош Керкез, кој пристигна од Борнмут. Иако забележа 36 настапи, тој започна како стартер во само 11 мечеви во Премиер лигата, што беше јасен сигнал дека е време за нов предизвик.
Робертсон официјално ќе им се приклучи на Спарси на 1 јули, веднаш по завршувањето на Светското првенство, каде со капитенската лента ќе ја предводи Шкотска во нивното прво мундијалско појавување во овој век.
