Светската фудбалска јавност сè уште е под импресии од синоќешниот брутален мастерклас на Лионел Меси. Аргентинскиот капитен со хет-трик го сруши Алжир (3-0) на стартот од Светското првенство и се израмни со Мирослав Клосе на врвот на вечната листа на стрелци со 16 мундијалски погодоци.
Неговата вонземска партија не ги остави рамнодушни ниту најголемите светски ѕвезди, а меѓу првите кои реагираа беше норвешката гол-машина Ерлинг Халанд. Напаѓачот на Манчестер Сити, кој и самиот претходно имаше деби од соништата постигнувајќи два гола, преку својот Снепчет профил кратко и јасно ја коментираше магијата на Аргентинецот: „Меси е лудак!“, изразувајќи максимално восхитување за најдобриот на сите времиња.
Скалони: „Тој го носи целиот тим на својот грб“
Во таборот на „Гаучосите“ владее апсолутен делириум, но и длабока благодарност што сè уште можат да сведочат на вакви моменти од нивниот лидер. Селекторот Лионел Скалони на прес-конференцијата по натпреварот призна дека едноставно му недостигаат зборови за да ја опише големината на својот капитен.
„Останувам без зборови кога станува збор за Лео Меси. Ова го прави веќе цели 20 години. Она што тој го прави и го пренесува на теренот е апсолутно неверојатно“, изјави емотивниот Скалони пред новинарите во Канзас Сити. „Покрај тоа што постигна три гола, тој буквално го носеше целиот тим на својот грб. Сè додека тој сака да игра, ќе биде најдобриот на светот. Возбудливо е да го гледате, како за нас Аргентинците, така и за секој што го сака фудбалот. Да се игра на вакво ниво на речиси 39 години… тоа е навистина тешко да се објасни“.
