Фудбалскиот свет сè уште не може да се соземе од епскиот мастерклас што го приреди Лионел Меси во Канзас Сити, каде со феноменален хет-трик ја водеше Аргентина до рутинска победа од 3-0 над Алжир. И додека сите се воодушевуваат на неговите магични потези и шесте историски рекорди што ги сруши, во фудбалските кулоари и на социјалните мрежи почна да се врти едно друго, многу поконтроверзно прашање: Дали главниот судија го поштеди најголемиот на сите времиња од директен црвен картон?
Во центарот на вниманието се најде еден старт на Меси врз алжирски фудбалер, за кој судијата Рафи досуди само прекршок, без да покаже каква било јавна опомена.
Скаутинг од судиски агол: Интензитет, намера и (не)загрозување
Со оглед на тоа што видеото од стартот стана вирално, познатиот судиски експерт и инструктор со над 12 години искуство, Виктор (познат преку неговиот профил RefereeChannel), направи детална анализа на спорниот момент. Според него, одлуката на ВАР-собата да не интервенира е целосно оправдана, иако Меси дефинитивно заслужил жолт картон.
„Кога ќе ја погледнете ситуацијата, Меси најпрво го допира задниот дел од ногата на алжирскиот играч. Тој почнува да паѓа, а потоа Меси го удира со крампоните по листот на ногата. Овде е важно да се знае како да се суди оваа ситуација. Морате да погледнете дали ова ги исполнува критериумите за ‘сериозен прекршок’. Ова не е насилно однесување, бидејќи имаше обид да се игра на топка и не е намерно,“ објаснува експертот.
Тој додава дека за да се додели црвен картон за сериозен прекршок, стартот мора да содржи „прекумерна сила, бруталност или загрозување на безбедноста на противникот“.
„Во овој случај нема прекумерна сила, ниту бруталност. Дали ја загрозува безбедноста на противникот? Бидејќи прво имаше контакт на задната страна од ногата, противникот почна да паѓа. Значи, неговата нога беше свиткана, а стапалото не беше целосно поставено на земјата. Ова ја прави силата на ударот помалку интензивна. И кога Меси го удри со крампоните, тој веднаш ја повлече својата нога назад. Значи, тоа не беше полна сила врз листот,“ детално анализира Виктор.
Жолт, а не црвен картон
Заклучокот на стручњакот е дециден: Иако стартот делува незгодно на успорена снимка, не ги исполнува критериумите за директно исклучување.
„Иако може да се расправа за црвен картон овде, тоа би било само поради ‘загрозување на безбедноста на противникот’. Но, во овој случај, интензитетот не е доволен за такво нешто. Со сите овие фактори, жолт картон е најсоодветната одлука за невнимателен (reckless) старт. Ова е случаен контакт, но е невнимателен и жолт картон е вистинската казна. Не ги исполнува критериумите за очигледен црвен картон и затоа ВАР избра да не интервенира,“ заклучува тој во својата анализа.
Дали судијата на терен направи грешка што не му даде барем жолт картон на Меси? Апсолутно да. Но, теориите на заговор дека ВАР-собата намерно замижала за да го спаси Аргентинецот од исклучување, паѓаат во вода пред судиските правила и критериуми.
