Репрезентацијата на Мексико испиша историја станувајќи првата национална селекција која официјално обезбеди пласман во нокаут-фазата (1/16 финале) на Светското првенство 2026. Кодомаќинот на турнирот стигна до втората победа во Групата А совладувајќи ја Јужна Кореја со минимални, но огромни 1-0 на стадионот во Гвадалахара.
Со максимален учинок по две кола, избраниците на селекторот Хавиер Агире си го осигураа првото место во групата, што им гарантира дека своите натпревари од 1/16 финалето, а потенцијално и од осминафиналето, ќе ги играат пред своја публика на култниот стадион „Ацтека“ во Мексико Сити. Потенцијален ривал во осминафиналето (онаму каде Мексико традиционално испаѓа) би можела да биде моќната Англија.
Свирежи на полувремето и експресен одговор
Натпреварот започна исклучително нервозно за домашните фудбалери. Стратегијата на Агире да излезе со „борбен“ состав на сметка на креативноста не вроди со плод во првото полувреме. Мексиканците изгледаа безидејно, што предизвика револт кај преку 50.000 навивачи кои со гласни свирежи ги испратија своите фудбалери на пауза.
Сепак, свирежите очигледно делуваа мотивирачки. Веќе во 50-та минута, играчот од средниот ред Луис Ромо се најде на вистинското место во вистинско време. По еден судир на јужнокорејскиот голман Ким Сеунг-гју со својот соиграч Ли Ги-хјук, топката му испадна од рацете, а Ромо ја искористи катастрофалната грешка и лесно ја смести во празната мрежа. Погодокот беше своевидна одмазда на Ромо кон критичарите кои го напаѓаа пред натпреварот поради неговите изјави дека екипата „не треба да игра под притисок“.
Одбрана на турнирот во режија на Раул Ранхел
До крајот на натпреварот, Мексико можеше да го зголеми водството, но ударите на Раул Хименез (од тежок агол) и на резервистот Обед Варгас беа одлично запрени од голманот Ким.
На спротивната страна, Јужна Кореја остави блед впечаток. Азијците играа премногу тактички, со многу посед, но без конкретна закана, поради што и нивниот капитен Сон Хеунг-мин (кој претходно имаше еден поништен гол поради офсајд) беше заменет уште во 56-та минута.
Првиот вистински удар кон голот Јужна Кореја го упати дури во 87-та минута, и тоа донесе вистинска драма. По еден одличен центаршут, Чо Ге-сунг биеше силно со глава од непосредна близина. Голманот на Мексико, Раул Ранхел, се фрли и изведе чудесна одбрана, а потоа, иако паднат на земја, успеа со рака да го спречи отпадокот да заврши во мрежата и дури го фати третиот обид на О Хјеон-гју! Оваа тројна интервенција веќе се најавува како најдобрата одбрана на турнирот досега.
Јужна Кореја, и покрај поразот, останува во добра позиција за пласман понатаму. Во последното коло, во четврток, ќе се соочи со Јужна Африка, додека Мексико ќе игра против Чешка.
