Светското првенство во фудбал отсекогаш било игра на бројки – кој постигнал најмногу голови, кој има најмногу бодови и кој ќе обезбеди пласман во нокаут-фазата. Но, додека репрезентациите ги кршат копјата на зелените терени, зад кулисите се одвива уште една, подеднакво сурова и милионска битка. Тоа е војната помеѓу двата спортски гиганти „Nike“ и „Adidas“ за превласт на пазарот и срцата (и паричниците, да не се лажеме) на фудбалските фанови.
Оваа година, двата бренда ги поминаа сите досегашни граници, лансирајќи кампањи кои повеќе наликуваат на холивудски блокбастери отколку на обични спортски реклами.
Блокбастери од реклами: Мбапе против Меси, милиони против милиони
„Nike“ годинава ја претстави својата кампања под наслов „Rip the script“, каде главните улоги им припаднаа на Килијан Мбапе, Ерлинг Халанд, Кристијано Роналдо, па дури и кошаркарската легенда Леброн Џејмс. Од друга страна, „Adidas“ одговори со својата приказна „Backyard Legends“, во која блескаат младиот Ламин Јамал, Џуд Белингем, Лионел Меси, Зинедин Зидан, па дури и компјутерски генерирана (AI) верзија на Дејвид Бекам.
In this Backyard, it’s “win or go home,” and this crew hasn’t left since the 90’s.
— adidas (@adidas) May 7, 2026
Where there’s a pitch, there’s a legend. #YouGotThis pic.twitter.com/EJpQSHcWEi
Германскиот бренд „Adidas“ потрошил неверојатни 50 милиони фунти за изработка на својата реклама. Сепак, доколку се судри рејтингот на социјалните мрежи, во овој момент „Nike“ води убедливо на платформата YouTube, каде нивното видео има собрано фантастични 76 милиони прегледи, наспроти 7-те милиони на нивниот најголем ривал.
Од „Nike“ објаснуваат дека во дигиталната ера една полирана реклама веќе не е доволна, туку целта е да се создаде цел дигитален фудбалски универзум кој фановите и креаторите ќе можат самите да го ремиксаат и да го направат дел од поп-културата.
It was all going to plan until instincts took over…
— Nike (@Nike) June 4, 2026
Rip The Script pic.twitter.com/la43icZaAu
Битката за Њујорк: „Adidas“ доминира во САД, „Nike“ фокусиран на кошарката
Иако рекламата на „Nike“ има повеќе прегледи на интернет, ситуацијата на терен во САД е сосема поинаква. Во модното срце на Њујорк, во квартот Сохо, водечките продавници на двата бренда се наоѓаат точно една наспроти друга, но „Adidas“ е тој кој целосно живее во знакот на Мундијалот. Целиот објект е прекриен со мундијалски брендинг, а дресовите и официјалните производи се во прв план.
Спроти нив, „Nike“ направи изненадувачки потег и реши најголемиот дел од вниманието во својата главна продавница во САД да го посвети на кошаркарите на Њујорк Никс, кои неодамна ја освоија титулата во НБА лигата.
„Adidas“ моментално победува и на улиците низ Менхетен. Нивните специјални мундијалски „pop-up“ штандови се видливи на секој чекор. Германскиот гигант направи одличен спој меѓу фудбалот и уличната мода, а нивните гостински дресови за репрезентациите на Јапонија и Курасао станаа вистински хит меѓу младите како моден детаљ за секојдневие, засенувајќи ги дури и официјалните дресови на САД кои ги изработува „Nike“.
Дресови, копачки и астрономски договори
Кога станува збор за бројот на репрезентации кои ги облекуваат на овој турнир, „Adidas“ има минимална предност со 14 национални тимови, додека „Nike“ зад себе има 12. Веднаш зад нив е „Puma“ со 11 репрезентации.
Оваа војна се пренесува и на персоналните спонзорства за копачките кои ги носат најголемите ѕвезди. Зад секое појавување на играчите стојат милионски суми, како на пример долгогодишниот договор на Кристијано Роналдо со „Nike“ кој му носи близу 18 милиони долари годишно. На спротивната страна се Меси, Белингем и Јамал кои се заштитни лица на „трите ленти“.
Крајниот победник и одговорот на прашањето кој продал повеќе спортска опрема нема да биде познат уште долго по завршувањето на Мундијалот и кревањето на златниот пехар. Но едно е сигурно – фудбалот повеќе не е само спорт, туку најмоќната алка која ја поврзува глобалната поп-култура, музиката и модата.
