Во ноќ исполнета со историско значење за хрватскиот фудбал, избраниците на Златко Далиќ успеаја да ја преживеат незгодната Панама и со минимални 1-0 да ги задржат шансите за пласман во нокаут-фазата на Мундијалот.
Откако првото полувреме помина во знакот на бледата игра на „Коцкестите“ и опасен висок пресинг од страна на Панама, селекторот Далиќ мораше да реагира со две офанзивни замени на паузата. Потегот вроди со плод речиси веднаш. Во 54-та минута (по само осум минути минати на теренот), напаѓачот на Осасуна, Анте Будимир, одлично го проследи ниското нафрлување на Јосип Станишиќ и рутински ја смести топката во мрежата.
Сепак, херој на Хрватска беше и голманот Доминик Ливаковиќ, кој со серија фантастични интервенции во краток временски период спречи израмнување од страна на упорните Панамци. Со овој пораз, Панама и официјално ги пакува куферите и го завршува својот настап на Мундијалот, иако избраниците на Томас Кристијансен ги освоија симпатиите на фудбалскиот свет со својот храбар и отворен напаѓачки фудбал.
Историска ноќ за маестро Модриќ: 200 натпревари во националниот дрес
Натпреварот на „БМО Филд“ засекогаш ќе остане врежан во историјата како 200-ти настап на Лука Модриќ за хрватската репрезентација. 40-годишниот капитен, кој го игра својот петти Мундијал, стана само четвртиот фудбалер во историјата на машкиот фудбал кој ја достигнал оваа неверојатна бројка (по Кристијано Роналдо, Лионел Меси и Бадер Ал-Мутава).
И покрај тоа што брзото темпо на Панама го принуди Модриќ да игра нешто поповлечено, неговата генијалност остана недопрена, тој комплетираше 88% од своите додавања, задржувајќи го рекордот од над 80% успешност во сите негови 19 мундијалски настапи.
По завршувањето на мечот, кога беше заменет во 81-вата минута проследен со стоечки овации, соиграчите го фрлаа во воздух во знак на почит. Му беше врачен и специјален дрес со натпис „БЕСКОНЕЧНО НАСЛЕДСТВО“ и бројот 200, каде нулите беа симболично заменети со знакот за бесконечност (2∞).
Домашна атмосфера во Канада
Хрватска ја имаше привилегијата да игра во вистинска домашна атмосфера, благодарение на огромната дијаспора во Торонто (околу 130.000 Хрвати живеат во регионот). Навивачите направија вистински спектакл пред стадионот марширајќи со 100-метарско знаме, факли во црвена и сина боја и патриотски песни кои ечеа од трибините во текот на целиот натпревар.
🇭🇷CROATIA IN TORONTO🇭🇷
— Lukas Weese (@Weesesports) June 23, 2026
The buzz is real outside BMO Field in Toronto.
Croatian supporters are dancing and chanting.
It’s going to feel like a Croatia home match tonight. #Croatia pic.twitter.com/x9YdGO4PK9
„Коцкестите“ сега се наоѓаат на третото место во Групата Л со само еден бод помалку од Англија и Гана. В сабота во Филаделфија ги очекува решавачка пресметка против Гана, каде со победа сигурно ќе обезбедат пласман во осминафиналето (со 95% шанси според проекциите).
