Воведувањето на задолжителните паузи за хидратација во 22-та и 67-та минута од секој натпревар на Светското првенство предизвика лавина од реакции и критики од фудбалската јавност. Голем дел од играчите, тренерите и стручните аналитичари сметаат дека овие прекини го уништуваат природниот ритам на играта. Сепак, претседателот на ФИФА, Џани Инфантино, цврсто застана во одбрана на новото правило, нарекувајќи го „чисто спортска материја“ и уверувајќи дека светската куќа на фудбалот нема никаков финансиски бенефит од нив.
Критиките пристигнаа од звучни тренерски имиња на овој Мундијал. Селекторот на Уругвај, Марсело Биелса, истакна дека концептот на фудбал во четири четвртини наместо две полувремиња „не донесува ништо, а одзема многу“. Англискиот кормилар Томас Тухел се согласи дека дополнителните интервали го менуваат самиот „идентитет“ на фудбалската игра. Од друга страна, шпанскиот стратег Луис де ла Фуенте смета дека хидратацијата при екстремни температури е правилен избор, но јавно запраша зошто овие паузи мора да се применуваат и на натпревари каде што времето е посвежо или кога се игра под затворен покрив.
Еднакви услови за сите тренери на турнирот
Во официјалното соопштение објавено во вторникот вечерта, Инфантино детално ги образложи причините зад оваа радикална одлука.
„Главната причина е жештината, но мора да разбереме и дека на натпреварување како Светското првенство, кое се игра во рок од 39 дена, тимовите потенцијално можат да одиграат дури осум натпревари. Затоа, моментот за одмор е исклучително важен. Она што ни е уште поважно е да обезбедиме сите тимови, на секој натпревар, да играат под апсолутно исти услови. Тешко е да се прифати еден тренер да има можност тактички да влијае на натпреварот со корекции само затоа што во тој момент е пожешко, додека друг тренер, на натпревар каде температурата е малку пониска, ја нема истата шанса. Сакаме еднакви услови за сите и затоа овие паузи се имплементирани на секој натпревар”.
ФИФА тврди дека не профитира од ТВ-рекламите
Покрај нарушувањето на ритамот, јавноста брзо посочи дека овие триминутни прекини им овозможуваат на телевизиските куќи да емитуваат дополнителни блокови со реклами во сред натпревар. Дефанзивецот на САД, Антони Робинсон, по првиот меч против Парагвај јавно проговори за оваа појава, откривајќи дека судиите на теренот им велеле: „Не брзајте, имате повеќе време, во ред е бидејќи рекламите сè уште течат“.
Сепак, Инфантино категорично отфрли каква било поврзаност со дополнителен профит за неговата организација. Тој појасни дека ФИФА нема дополнителни приходи од овие паузи, со оглед на тоа што сите комерцијални и спонзорски договори биле потпишани многу одамна пред почетокот на турнирот, заклучувајќи дека прашањето околу хидратацијата воопшто не е финансиско.
