Поради тековните регионални предизвици, Големата награда на Бахреин за 2026 година нема да се вози на Блискиот Исток, туку привремено се сели директно на легендарната патека „Сепанг“ во Малезија.
Челниците на Формула 1 и ФИА официјално потврдија дека е постигнат уникатен договор меѓу владите на Бахреин и Малезија, со што се спасува одржувањето на трката. Настанот официјално ќе се вика „Формула 1 Галф Ер Голема награда на Бахреин во Малезија“ и ќе се одржи од 2 до 4 октомври 2026 година, сместувајќи се во календарот помеѓу трките во Азербејџан и Сингапур. Остатокот од распоредот за 2026 година останува непроменет.
Сензационален камбек на култниот „Сепанг“
Оваа одлука значи враќање на една од најомилените и најпредизвикувачките патеки во историјата на Ф1. „Сепанг“ дебитираше во 1999 година и е добро познат по своите страсни навивачи, возбудливото тркање и крајно непредвидливите временски услови. Последен пат моторите таму грмеа во 2017 година, кога триумфираше Макс Ферстапен.
Претседателот и извршен директор на Ф1, Стефано Доменикали, не го криеше задоволството од овој потег:
„Среќни сме што можеме да потврдиме дека Малезија ќе биде домаќин на Бахреин Гран При во 2026. Уште еднаш, спортот покажа способност да се прилагоди, да најде решенија и да испорача резултат. Ова е фантастична вест за нашите фанови кои ќе продолжат да уживаат во целосен календар, а истовремено ќе го видат враќањето на спортот на една извонредна локација“.
Принцот на Бахреин: Стабилност во тешки времиња
Преместувањето на трката е резултат на блиската соработка и братските односи меѓу двете држави. Принцот-престолонаследник и премиер на Бахреин, Салман бин Хамад Ал Калифа, истакна дека ова е клучен потег за зачувување на настанот.
„Среде тековните регионални предизвици, Бахреин е горд што стои како столб на стабилност за Формула 1. Ова ќе биде прекрасно искуство за фановите ширум светот и ја одразува нашата трајна посветеност кон спортот“, изјави принцот Салман.
Премиерот на Малезија, Анвар Ибрахим, ја поздрави довербата која им е укажана од страна на Бахреин, нагласувајќи дека Малезија е целосно подготвена со својата инфраструктура од светска класа да ги пречека Ф1 тимовите и фановите назад на култниот „Сепанг“. Информациите за пуштањето на билетите во продажба се очекуваат наскоро.
