РК Вардар не мирува пред почетокот на новата сезона. “Црвено-црните” денес го зголемија својот играчки ростер со уште две засилувања на клучната позиција среден бек. Клубот потврди дека нови членови на тимот ќе бидат 19-годишниот јапонски талент Харуки Кавада и искусниот аргентински репрезентативец Николас Боно. Двајцата ќе се приклучат на подготовките кон крајот на месецот.
Харуки Кавада – азиска надеж за европски предизвици
Кавада доаѓа од младинската репрезентација на Јапонија со која настапи на Светското првенство во Полска, каде што тимот заврши на 16. место. На минатогодишното Азиско првенство беше прогласен за најкорисен играч (МВП), а ракометната јавност во Јапонија го гледа како еден од најголемите таленти на генерацијата.
Николас Боно – аргентинска сила со европско искуство
На истата позиција, Вардар го добива и 27-годишниот Николас Боно, актуелен играч на францускиот Истр. Неговата кариера започна во Балестер (Аргентина), продолжи во бразилски Таубате, а потоа играше и во шпанските клубови Замора и Синфин – каде што постигна 140 голови на 29 меча. Има и настапи за Шербур, а сезонава настапуваше за Истр.
Боно е стандарден член на аргентинската репрезентација и има настапи на Олимписките игри 2024, првенството на Средна и Јужна Америка и Светското првенство 2025.
Со вакви засилувања, Вардар јасно ја покажува амбицијата да се врати на старите патеки на успех и повторно да биде сериозен играч на македонската и европската ракометна сцена.
