Македонската машка јуниорска кошаркарска репрезентација денеска го започнува настапот на Европското првенство до 18 години во Дивизија А, кое од 26 јули до 3 август се одржува во Белград.
Избраниците на селекторот Горан Андреевски ќе ги бранат боите на Македонија против европски кошаркарски сили како Литванија, Грција и Србија, во групата “Ц”.
Ова е единствена македонска репрезентација што ова лето настапува во највисокото европско друштво “ТОП 16”. Задачата е предизвикувачка, конкуренцијата жестока, но нашиот млад состав оди во Белград со јасна цел – опстанок меѓу најдобрите и борба за секунда на теренот.
“Се подготвувавме напорно, трениравме во одлични услови во СЦ ‘Борис Трајковски’, одигравме пет пријателски натпревари. Сѐ уште немаме реална слика каде сме во однос на селекциите од А дивизијата, но екипата е мотивирана и ќе даде сѐ од себе”, вели селекторот Андреевски.
Тимот ќе настапи без првиот плејмејкер Лука Марјановиќ, како и без натурализираниот Бутемер, кој во последен момент не доби македонски пасош. Но тоа не е причина за предавање.
“Одиме максимално мотивирани. Не сме тука за прошетка, туку за борба. Имаме многу млада екипа, осуммина родени 2008 година, но ќе се потрудиме да покажеме карактер и да избориме респект од секој противник”, порачува селекторот.
