Формула 1 се подготвува за нова, револуционерна ера. Од сезоната 2026 стапуваат на сила целосно нови правила за моторите, што предизвика вистински “земјотрес” на пазарот и доведе до големи промени и нови, возбудливи партнерства.
Доаѓаат нови гиганти како Ауди и Кадилак, некои тимови ги менуваат своите долгогодишни партнери, а некои, како Ред Бул, тргнуваат по сопствен пат. Ова се промените што ќе го дефинираат спортот во наредната деценија.
Најголемите промени: Ред Бул со Форд, Астон Мартин со Хонда
Најголемата вест е дефинитивно крајот на соработката помеѓу Ред Бул и Хонда, партнерство кое им донесе четири последователни титули на Макс Верстапен. Од 2026 година, Red Bull и нивниот сестрински тим Racing Bulls ќе возат со сопствени мотори, развиени во соработка со американскиот гигант Форд. Ова е храбар, но и ризичен потег кој предизвика многу дебати меѓу фановите.
Хонда, пак, останува во спортот, но како партнер на амбициозниот тим на Астон Мартин, кој се откажува од моторите на Мерцедес.
Уште една голема промена е тоа што тимот на Алпин ја прекинува соработката со Рено и во иднина ќе користи мотори на Мерцедес.
Нови имиња на гридот: Пристигнуваат Ауди и Кадилак
Формула 1 од 2026 ќе биде побогата за два огромни автомобилски бренда. Ауди и официјално влегува во спортот како фабрички тим, преземајќи го тимот на Заубер, и ќе развива сопствени мотори.
На гридот ќе се појави и американскиот гигант Кадилак, како 11-ти тим. Она што е интересно е што тие на почетокот ќе користат мотори на Ферари, пред во 2029 година да преминат на сопствен агрегат развиен од General Motors.
Во продолжение, погледнете ја деталната листа на сите тимови и нивните мотори за 2026 година:
View this post on Instagram
Кој останува со истите партнери?
И покрај големите промени, неколку тимови остануваат верни на своите партнери. Мекларен, Вилијамс и фабричкиот тим на Мерцедес остануваат со германскиот производител, додека Хас и фабричкиот тим на Ферари продолжуваат со италијанските мотори.
Овие промени ветуваат целосно нов распоред на силите и многу понеизвесни трки. Дали Ред Бул ќе може да ја продолжи да го брка врвот со сопствен мотор? Како ќе се снајдат Ауди и Кадилак? Одговорите ќе ги добиеме на почетокот на сезоната 2026 која што започнува на почетокот на март 2026 година во Австралија.
