Медицинскиот билтен на Кристијан Пулишиќ е главна тема во спортската јавност во Соединетите Американски Држави во пресрет на нивниот втор натпревар на Светското првенство. Првата ѕвезда на репрезентацијата е под голем знак прашалник за петочната пресметка против Австралија во Сиетл, откако заработи повреда на листот на левата нога.
Неизвесноста околу неговиот статус трае откако крилниот напаѓач мораше предвреме да го напушти теренот на полувремето за време на убедливата победа над Парагвај во првото коло. Иако првичните прогнози беа оптимистички, развојот на настаните во изминатите неколку дена донесе сериозна загриженост во таборот на домаќинот.
Покетино бара трпение, Пулишиќ тренира одвоено
Селекторот Маурисио Покетино на официјалната прес-конференција пред натпреварот истакна дека состојбата на Пулишиќ се подобрува, но одби да потврди дали тој ќе биде подготвен за настап на стадионот „Лумен Филд“.
„Ќе видиме каква ќе биде ситуацијата. Тој вложува огромен напор за да биде подготвен. Ментално е многу силен. Доколку не биде достапен за утрешниот меч, сигурно ќе биде подготвен за следниот натпревар“, изјави аргентинскиот стратег.
Проблемот на Пулишиќ започнал уште на тренинг пред мечот со Парагвај кога добил силен удар во листот, а повредата се влошила откако заработил нов удар на истото место за време на првото полувреме од мундијалското деби. Најголема грижа за американските фанови е фактот што 27-годишниот фудбалер цела недела тренираше одвоено од тимот. Тој извршуваше само модифицирани тренинзи, носејќи компресивен чорап на левата нога, фокусирајќи се на лесни вежби во импровизирана теретана.
Неговиот долгогодишен соиграч Вестон Мекени откри дека атмосферата во тимот е одлична, но медицинските прашања ги остава на стручниот штаб.
„Ментално е одлично. Играме Светско првенство на домашен терен, семејствата се тука со нас, хотелот ни е супер и се будиме со поглед кон плажата. Тешко е некој да биде психички паднат во вакви услови. Но, околу физичкото закрепнување, јас навистина не знам, јас сум си во некој мој свет. Се надеваме дека ќе биде со нас“, изјави Мекени.
Кој ќе го замени „Капетан Америка“?
Доколку Пулишиќ не добие зелено светло од медицинскиот тим, Покетино ќе се соочи со сериозна тактичка главоболка. Во американскиот состав не постои играч со идентични карактеристики кој може да ја реплицира неговата динамика, дриблинг и креативност.
Како потенцијални замени за крилните позиции фигурираат Џовани Рејна (кој веќе блесна на првиот меч), Тим Веа или Брендон Аронсон. Друга опција е промена на формацијата, каде Малик Тилман би добил поофанзивна улога, а средниот ред би се зацврстил со играчи како Ролдан или Берхалтер.
Натпреварот против Австралија има огромно значење. Победникот речиси сигурно ќе го осигура првото место во Групата Д, што гарантира многу поволна ждрепка и полесен пат во нокаут-фазата на турнирот.
