Ова требаше да биде денот на Кристијано Роналдо. Откако во вторникот фудбалскиот свет уживаше во суперчовечките перформанси на Ерлинг Халанд (два гола), Килијан Мбапе (два гола) и епскиот хет-трик на неговиот вечен ривал Лионел Меси, сите очекуваа 41-годишниот Португалец да одговори во свој стил. Но, наместо тоа, добивме бледа копија од некогашната гол-машина и шокантно реми (1-1) на Португалија против храбрата селекција на ДР Конго во Хјустон.
Бледиот Кристијано и „стравот“ на Мартинез
И покрај тоа што Роналдо сè уште безмилосно ги тресе мрежите во Саудиска Арабија (28 гола на 30 меча минатата сезона), неговиот учинок на големите натпреварувања станува сè позагрижувачки. Ова е негов десетти последователен натпревар на голем турнир (СП 2022, ЕУРО 2024 и СП 2026) на кој не успева да постигне погодок од игра (единствениот гол во овој период му е од пенал против Гана во 2022).
Во Хјустон, Роналдо беше практично отсечен од играта. Тој имаше само 25 допири со топката (најмалку од сите португалски играчи кои го одиграа целиот меч) и промаши две солидни шанси во второто полувреме по нафрлувањата на Франциско Консеисао.
Поранешниот англиски напаѓач, Крис Сатон, остро го критикуваше селекторот Роберто Мартинез за неговата одлука да го остави Роналдо на теренот сите 90 минути.
„Ова е срамота за Мартинез! Тој едноставно се плаши да го извади од игра. Мартинез очигледно не е главен менаџер тука. Можеби Роналдо ќе дадеше гол за победа, но натпреварот едноставно го одмина денеска“, изјави Сатон за време на преносот.
Поранешниот француски репрезентативец Гаел Клиши додаде интересна опсервација, велејќи дека присуството на Роналдо „несвесно ги гуши младите играчи“, бидејќи тие секогаш бараат да му подадат нему, наместо самите да преземат одговорност (како во ситуацијата кога Консеисао можеше сам да шутира, но реши да му асистира на Кристијано).
Really good analysis from Henry. This is the Ronaldo issue right now.
— Marc Geschwind (@MarcGeschwind) June 17, 2026
He's playing as a 9, but he's never been a 9 and he's not acting as a 9. Not giving Portugal those traits and it hurt them today. pic.twitter.com/yjSaOK2J5J
ДР Конго испиша историја, Португалија тотално безопасна
Иако Португалија поведе уште во шесттата минута со прекрасниот удар со глава на Жоао Невеш, тимот на Роберто Мартинез потоа изгледаше целосно безидејно. И покрај астрономските 75% посед на топка, Португалците упатија само седум удари кон голот, од кои САМО ЕДЕН беше во рамките на голот (самиот погодок).
Од друга страна, ДР Конго одигра херојски и апсолутно заслужено стигна до својот прв историски бод на Светските првенства. Израмнувањето пристигна пред крајот на првото полувреме преку Јоан Виса (напаѓачот на Њукасл), кој по одличниот центаршут на Масуаку со глава ја закова топката во мрежата. За Виса ова беше огромна сатисфакција по очајната клупска сезона обележана со повреди. Дефанзивниот бедем предводен од капитенот Шансел Мбемба одигра перфектно, оставајќи ги португалските суперѕвезди без никакво решение.
Солзи и емоции за Диого Жота
Надвор од фудбалското разочарување, натпреварот имаше и една длабоко емотивна нота. Пред почетокот на мечот, за време на интонирањето на португалската химна, на големиот екран се појави фотографија од Диого Жота, кој трагично го загуби животот (заедно со својот брат) во сообраќајна несреќа минатиот јули.
Неговите родители беа ВИП гости на стадионот, а голем дел од португалските фудбалери, вклучително и Бернардо Силва и Жоао Невеш, не можеа да ги задржат солзите. Селекторот Мартинез пред турнирот изјави дека најголема мотивација за тимот ќе биде да го остварат сонот на Жота – освојување на Светското првенство. Меѓутоа, судејќи според денешното издание, пред Португалците претстои исклучително долг и тежок пат.
