Младинската екипа на Еурофарм Пелистер продолжува да испишува прекрасна европска приказна! Младите битолски ракометари извојуваа огромна победа над врсниците од реномираниот дански Алборг со 24:23 во полуфиналето од квалификацискиот турнир за пласман на Ф4 во младинската Лига на шампиони, кој се одржува во Пореч (Хрватска).
Овој триумф значи дека „пелистерци“ се на само еден чекор од повторување на ланскиот историски успех, кога се пласираа на завршниот турнир во Келн. Но, за да стигнат до таму, утре ќе мора да го прескокнат најголемиот предизвик, германскиот гигант Фуксе Берлин.
Андреј Георгиев и Јован Мацанковски – херои на денот!
Натпреварот против скандинавската школа беше вистинска драма. По израмнетото прво полувреме (12:11 за Пелистер), македонскиот тим одигра фуриозно на стартот од вториот дел и стигна до највисоки +5 (20:15). Сепак, Данците не се предадоа, се вратија на минус еден во финишот и дури имаа напад за израмнување и продолженија на три секунди до крајот, но нивната акција заврши во аут.
Апсолутен херој во нападот беше 16-годишното десно крило Андреј Георгиев. Овој битолски бисер одигра партија за паметење, постигнувајќи неверојатни 12 голови (половина од сите голови на тимот!), од кои дури 10 во првото полувреме. За потсетување, Георгиев минатата сезона веќе дебитираше и за сениорскиот тим во Лигата на шампионите.
Огромна заслуга за победата има и голманот Јован Мацанковски, кој беше прогласен за МВП на натпреварот. Тој собра 13 интервенции, вклучувајќи и три одбранети седмерци во клучните моменти. Одличен настап имаше и Јован Симоновски со 5 погодоци.
Последна пречка: Моќниот Фуксе Берлин
За пласман на посакуваниот Фајнл-фор во Келн, избраниците на тренерите Мемиќ и Митревски утре (31 март) од 16:30 часот во салата „Жатика“ ќе се соочат со Фуксе Берлин.
Германскиот тим, предводен од легендарниот Боб Ханинг, покажа застрашувачка моќ во второто полуфинале, декласирајќи го хрватскиот Загреб со нестварни 50:29. Битолчани ќе мораат да обрнат посебно внимание на Лео Новак (7 гола против Загреб) и бековите Таунтехам и Блажек.
Задачата ќе биде пеколно тешка, но младите „пелистерци“ веќе докажаа дека имаат срце, карактер и квалитет за големи дела. Одиме во Келн!
