Македонскиот ракометен клуб, Еурофарм Пелистер, продолжува со кроењето на тимот за следната натпреварувачка сезона, а денеска официјално го потврди своето најново засилување. Станува збор за талентираниот босански интернационалец Едвин Џелиловиќ, кој доаѓа во Битола со епитетот на еден од најперспективните играчи на својата позиција во регионот.
23-годишното десно крило од Тузла стави потпис на тригодишен договор со „Пелистерци“, обврзувајќи се на верност кон клубот во наредниот период во кој битолчани планираат нов напад на домашните трофеи и забележителен настап во Европа.
Шампионски менталитет од Извиѓач
Џелиловиќ пристигнува во „најракометниот град“ со богато педигре. Тој беше еден од клучните алки во доминацијата на Извиѓач, клуб кој владее со ракометната сцена во Босна и Херцеговина. Претходно, својот квалитет го калеше и во дресот на Грачаница, што му овозможи веќе на 23 години да поседува завидно искуство.
Со своите 189 сантиметри висина и 69 килограми, Џелиловиќ е прототип на модерно крило – исклучително брз, со одличен одраз и прецизна реализација. Неговиот квалитет веќе беше тестиран на меѓународна сцена, каде во последните неколку сезони остави силен впечаток настапувајќи во Европската лига и ЕХФ Европскиот Куп.
Претставување во јули
Од клубот порачуваат дека талентот и квалитетот на Едвин се неспорни, па затоа патиштата на Пелистер и младиот Босанец природно се споија. Навивачите во Битола со нетрпение го очекуваат новото засилување, а официјалното претставување на Џелиловиќ ќе се случи на почетокот на подготовките за сезоната 2026/27, закажани за јули годинава.
