Најдобрата можна вест за навивачите на Арсенал пристигна попладнево – Букајо Сака се согласи на нов, подобрен договор кој ќе го задржи на „Емирати“ до јуни 2031 година. Иако неговиот претходен договор беше со важност до 2027 година, раководството на клубот не сакаше ништо да препушти на случајот и предвреме ја осигура иднината на својот најдобар фудбалер.
Со овој потег, 24-годишното крило добива статус кој доликува на еден од најдобрите играчи во Премиер лигата и Европа, со плата која го рефлектира неговото значење во системот на Микел Артета.
Клучниот столб на проектот на Артета
Букајо Сака е симбол на модерниот Арсенал. Од своето деби во 2018 година, тој прерасна во лидер на нападот, забележувајќи над 250 настапи со импресивен учинок од 77 гола и 78 асистенции. Оваа сезона, Сака повторно е клучна фигура со седум погодоци во моментите кога Арсенал се бори за титулата и доминира во Лигата на шампионите со перфектен учинок во групната фаза.
Продолжувањето на соработката со Сака е само дел од стратегијата на клубот за зачувување на јадрото на тимот, откако во изминатиот период договорите ги продолжија и Вилијам Салиба, Габриел, како и младите таленти Итан Нванери и Мајлс Луис-Скели.
Фокус на титулата и Светското првенство
Со решен статус и отстранети шпекулации за интерес од други европски гиганти, Сака сега може целосно да се посвети на финишот од сезоната каде Арсенал важи за главен фаворит за прекинување на две децении долгиот пост без премиерлигашка титула. Веднаш потоа, го очекува и клучна улога во дресот на Англија на претстојното Светско првенство.
