Во натпревар кој ветуваше пекол и го оправда секој епитет за дерби, Данска славеше над Германија со 31:26 (13:12), со што стана првата репрезентација која официјално обезбеди место во полуфиналето на ЕХФ ЕУРО 2026. Иако Германија пружи силен отпор, домашната „машинерија“ во второто полувреме покажа дека во моментов е на друго ниво.
Изненадувањето на Гисласон: Шпет наместо Волф!
Селекторот на Германија, Алфред Гисласон, ги шокираше сите со почетниот состав, оставајќи го херојот од претходниот меч, Андреас Волф, на клупата. На негово место започна младиот Давид Шпет, кој одигра феноменално прво полувреме, бранејќи на исто ниво како и данската ѕвезда Емил Нилсен. Благодарение на Шпет и расположениот Ренарс Ушчинс, Германија на пауза замина со само еден гол негатива.
Данска ја презеде контролата во второто полувреме
Натпреварот се кршеше во последните 20 минути. Иако Данска имаше период од девет минути без постигнат гол на преминот меѓу двете полувремиња, нивната одбрана не попушти. Кога нападот на Германија требаше да притисне за пресврт, се појави Емил Нилсен.
Данскиот голман (прогласен за играч на натпреварот) беше несовладлив во клучните моменти, завршувајќи со 14 одбрани. Германските ракометари едноставно „се скршија“ од неговиот ѕид, што им овозможи на Матијас Гидсел и Симон Питлик (двајцата со по 8 гола) да направат серија и да го зголемат водството на недостижни плус 7.
For the 3rd time in this tournament, Emil Nielsen is the @grundfos Player of the match 😍👏
— EHF EURO (@EHFEURO) January 26, 2026
Huge. #ehfeuro2026 pic.twitter.com/896IshoKi7
Што значи ова за табелата?
Данска со оваа победа веќе може да ги пакува куферите за завршниот викенд во Стокхолм. Од друга страна, Германија сега ја чека „пресуден“ дуел против Франција во последното коло. На Германците ќе им биде потребен најмалку еден бод за да го потврдат своето место во полуфиналето, додека Франција по поразот од Шпанија е во ситуација каде мора да оди на сè или ништо.
