Кога ќе го прашате кој било навивач на Њукасл што е тоа што го прави овој играч посебен, одговорот секогаш е ист: „Тој е еден од нашите“. Во градот каде фудбалот е религија, нема посвета магија од онаа кога момче кое пораснало на трибините на „Сент Џејмс Парк“ ќе истрча на тревата и ќе го реши натпреварот во 92-та минута.
Тоа е приказната за Луис Мајли. Тинејџерот кој не е само уште еден талент од академијата, туку локален херој кој живее за црно-белиот дрес.
Пожртвуваност која ги освои „Џорди“ навивачите
Утрото пред четвртфиналето од Карабао купот против Фулам, Еди Хау се соочи со кошмар – пет повредени дефанзивци. Решението? Да го замоли 19-годишниот Мајли, кој по вокација е играч за врска, да игра како десен бек.
Мајли имаше само еден тренинг да научи како да биде бек. Но, наместо да се жали, тој го направи она што го прават само вистинските лидери – ја наведна главата и излезе на теренот да „гине“ за тимот. Не само што одигра беспрекорно во одбраната, туку во 92-та минута се појави како „дух“ во противничкиот шеснаесеттник и со глава ја заби топката во мрежата за пласман во полуфиналето.
„Јас пораснав тука. Ова е нереално чувство. Не можеше да биде подобро“, изјави Мајли по натпреварот, додека целиот стадион го скандираше неговото име.
“I was BUZZING!” 🤩
— ITV Football (@itvfootball) December 17, 2025
Local boy, local hero – match-winner, Lewis Miley speaks with Gabriel Clarke after Newcastle’s win over Fulham#ITVFootball | #CarabaoCup | 🎙️ @gabrielclarke05 pic.twitter.com/GaCfBFIQov
Фудбалско образование на највисоко ниво
Поранешните легенди на клубот кои го коментираа натпреварот беа воодушевени. Тие истакнаа дека Мајли моментално ги држи на клупа ѕвездите како Жоелинтон и Тонали, покажувајќи зрелост која не соодветствува со неговите години.
Еди Хау не штедеше зборови: „Тој може да биде добар колку и секој друг на неговата позиција, на која било позиција и да игра. Има сè, не можам да го оценам доволно високо“.
A massive moment from @LewisMiley1! 😍 pic.twitter.com/GpjbWNRODq
— Newcastle United (@NUFC) December 17, 2025
По стапките на Ширер
Мајли е дел од онаа ретка група играчи кои го разбираат емотивниот товар на Њукасл. Тој знае што значи поразот во дербито против Сандерленд и колку болат неуспесите. Токму затоа, неговиот гол не беше само гол за победа, туку за заздравување на раните на навивачите.
Како што истакнаа аналитичарите, да играш за својот локален клуб, за тимот кој си го гледал од трибините како дете, носи посебна еуфорија која не може да се купи со пари. Луис Мајли не е само иднината на Њукасл, тој е неговата сегашност и неговото срце.
