Целиот фудбалски свет вечерва на момент замрзна, откако се појавија застрашувачките вести од Данска. Искусниот 34-годишен играч за врска, Кристијан Ериксен, ненадејно се сруши на тревникот за време на пријателскиот натпревар меѓу Данска и Украина кој се одигра во Одензе. Натпреварот беше веднаш прекинат во 65. минута, а по неколкуминутна паника на теренот, данската фудбалска асоцијација ги смири страстите со потврда дека фудбалерот е во свесна состојба и надвор од животна опасност.
Овој инцидент предизвика брутален дежа-ви ефект и шок кај навивачите, со оглед на тоа што Ериксен доживеа срцев удар на ЕП 2020 (во 2021 година) на мечот против Финска. Тогаш неговиот живот беше спасен со брза реанимација, по што му беше вграден специјален дефибрилатор (ИЦД апарат – тип на пејсмејкер) кој му овозможи да ја продолжи кариерата во Брентфорд, Манчестер Јунајтед, а од минатото лето и во германски Волфсбург каде сезонава одигра 34 мечеви. Вечерва, токму тој апарат заврши клучна работа на теренот.
Докторот потврди: Апаратот реагираше перфектно, Кристијан сам пешачеше до амбулантата
Официјалниот доктор на данската репрезентација, Мортен Боесен, веднаш по прекинот на натпреварот ги соопшти клучните детали кои донесоа огромно олеснување кај јавноста. За разлика од претходниот хорор во Копенхаген, Ериксен овојпат брзо закрепна на самиот тревник.
„Кристијан е добар и самиот на свои нозе го напушти теренот. Како што јас ја гледам ситуацијата, вградениот пејсмејкер (ИЦД) реагираше точно онака како што требаше и како што беше програмиран. Ериксен накратко беше во несвест, но премногу брзо се освести и веднаш воспоставивме контакт со него. Тој сега ќе замине во болница на дополнителни детални прегледи за да се утврди што точно го предизвика овој нов инцидент“, изјави д-р Боесен, додавајќи дека Ериксен веќе пратил поздрави до соиграчите со порака дека е сосем добар.
Капитенот Хојбјерг во шок, фудбалерите со жив ѕид околу својот соиграч
Ериксен вечерва го играше својот 151. натпревар за националниот тим, а моментот на падот сликовито го опиша капитенот Пјер-Емил Хојбјерг:
„Имаше еден аут, јас се свртев малку настрана и го видов Кристијан како паѓа на подот. Ние веќе добро знаеме како тој реагира и што значи тоа… Сите реагираа со супер-брзина и со огромна почит. Можам само да им честитам на медицинските лица кои покажаа огромна храброст. Секако дека доживуваш тежок шок, но најважно е што тој е добар“.
Исто како и пред пет години во Копенхаген, фудбалерите на Данска и Украина веднаш покажаа нереално единство и почит. Двата тима формираа силен жив круг околу Ериксен додека му се укажуваше помош за да го заштитат од камерите и јавноста, а обезбедувањето веднаш донесе црни платна. Откако Ериксен свесен замина со амбулантното возило кон болницата, судијата означи дефинитивен крај на мечот, а играчите и стручниот штаб прегрнати на центарот добија силен аплауз од публиката. Селекторот Брајан Ример порача дека сега е најважно сите да останат обединети и да си понудат поддршка едни на други по претрпениот стрес. За потсетување, ниту Данска ниту Украина не обезбедија пласман на претстојното Светско првенство кое започнува во четврток, па овој пријателски меч требаше да биде чиста контрола пред летниот одмор.
