Четвртокот помина во знакот на домашните тимови кои не дозволија ниту едно изненадување, иако Барселона и Жалгирис беа на чекор до голем пресврт.
Фенербахче не запира, деветта победа во низа
Фенербахче – Монако (88-70)
Тимот на Фенербахче е во застрашувачка форма. Синоќа ја запишаа својата деветта победа по ред, целосно доминирајќи против Монако. Уште од самиот почеток (12-4), турскиот гигант го диктираше темпото со „челична“ одбрана. Тален Хортон-Такер беше незапирлив со 28 поени, додека кај Монако, кој се наоѓа во сериозна криза, Мајк Џејмс уфрли само 14 поени. Фенер сега е на скор 22-7 и цврсто чекори кон врвот.
Драма во Валенсија: Бадио и Монтеро го „скршија“ Жалгирис
Валенсија – Жалгирис (91-87)
Валенсија успеа да го задржи второто место на табелата по вистински трилер во „Роиг Арена“. Домаќините имаа двоцифрена предност на полувреме, но Литванците не се предаваа и израмнија на 87-87 во последната минута. Сепак, Бранку Бадио погоди тежок шут од мртов агол за водство, а Жан Монтеро од линијата за слободни фрлања ја запечати победата откако Франциско промаши тројка за пресврт. Омари Мур со 16 поени беше прво име кај победниците.
Милано се коцкаше со +27, но ја „реши“ Барселона
ЕА7 Милано – Барселона (87-84)
Ова беше натпревар со две целосно различни лица. Милано во третата четвртина имаше неверојатни +27 (78-51) и се чинеше дека Барса ќе доживее дебакл. Но, во последната четвртина Италијанците „заспаа“, а Каталонците направија луда серија и дојдоа на само два поени негатива. Сепак, тимот на Еторе Месина некако издржа и ја прекина низата порази. Зак Ледеј со 16 поени и 7 скокови беше клучната фигура во овој трилер.
Марио Хезоња го спаси Кралот во финишот
Реал Мадрид – Виртус Болоња (92-84)
Реал Мадрид мораше добро да се испоти за да го скрши отпорот на Виртус. На пет минути до крајот беше нерешено (77-77), но тогаш на сцена стапи Марио Хезоња. Хрватот постигна 8 од своите 19 поени во самата завршница и ја донесе победата. Валтер Таварес додаде 14 поени и дури 5 блокади. Кај гостите, Карсен Едвардс беше најефикасен на мечот со 32 поени (дури 22 во првото полувреме), но тоа не беше доволно за изненадување во Мадрид.
