Европски класик за историја: Германија и Данска во директен судир за ракометниот трон!

Битка на бројките: Историјата против сегашноста. Кој има поголеми шанси за европскиот трон?

Германија или Данска, кој ќе го подигне својот трет трофеј на Европските првенства в недела (18:00 часот)? Германската репрезентација триумфираше во 2004 и 2016 година, додека Данците се искачија на врвот во 2008 и 2012 година. За Германија ова е четврто финале (вклучувајќи го и болниот пораз од Шведска во 2002), додека за Данска ова е петто учество во завршниот меч.

Тимот на Николај Јакобсен ги загуби последните две финалиња на ЕП (2014 и 2024), и двата пати од Франција. Сепак, Јакобсен е „машина“ за медали. Од 2019 година наваму, ова ќе биде негово деветто одличје. Од друга страна, Алфред Гисласон има шанса да стане вториот Исланѓанец по Дагур Сигурдсон (2016) кој ќе ја однесе Германија до златото. Без разлика на исходот, Германија го слави својот прв медал по пауза од десет години.

Искуство и рекорди

Од златната генерација на „Bad Boys“ од 2016 година, во германскиот состав сè уште се Андреас Волф, Руне Дамке и Јаник Колбахер. Андреас Волф в недела ќе испише историја: со 42 настапи на ЕП, тој ќе го престигне легендарниот Клаус-Дитер Петерсен и ќе стане рекордер во германскиот дрес.

Кај Данците, единствениот преживеан од последната титула во 2012 година е Расмус Лауге. Сепак, сите очи се вперени во Матијас Гидсел. Светскиот ракометар на годината моментално е прв стрелец со 61 гол. Доколку постигне барем 5 гола во финалето, ќе го собори апсолутниот рекорд на Сандер Сагосен (65 голови) од 2020 година.

Споредба на статистиката

Иако Данска е поефикасна во нападот, Германија ја има предноста меѓу стативите. Волф беше доминантен во полуфиналето, додека Нилсен имаше нешто поскромна вечер. Интересен факт: двата тима ги добија своите полуфиналиња со идентичен резултат – 31:28.

Традиција и меѓусебни дуели

Данска цели кон историски подвиг: да ги поседува истовремено сите три големи титули (Олимписки, Светски и Европски шампион), нешто што му успеало само на Франција во 2010 година.

Сепак, Германците бараат надеж во историјата:

• Во 2016 година, патот до златото водеше токму преку победа над Данска.
• Во 2004 година, Германија го совлада домаќинот (Словенија) во финалето.

Но, статистиката од поновата историја е сурова за Германија. Победата во 2016 е нивниот последен триумф над Данците. Оттогаш, Данска нанижа 7 победи по ред, вклучувајќи го и дебаклот на Германија во финалето на Олимписките игри во Париз (26:39).

Бундеслига против „Данскиот модел“

Финалето ќе биде пресметка на познаници. Дури десет дански репрезентативци играат во германската Бундеслига (HBL). Посебен зачин на натпреварот му дава Јури Кнор: „мозокот“ на германската игра, кој од летото 2025 година настапува за дански Олборг и е единствениот германски репрезентативец кој лебот го заработува надвор од татковината.

Следете нè: Facebook | Instagram | X

Гостинска статија на Марија Петровска