Ако некој се прашуваше кој е главен фаворит за златото на претстојните Зимски олимписки игри во Милано и Кортина, одговорот стигна од Вилинген. Словенечката сензација, Домен Превц, ја запиша својата четврта последователна победа во Светскиот куп, демонстрирајќи застрашувачка форма пред најважниот испит во кариерата.
Во последното натпреварување пред олимписката пауза, маглата во Вилинген (Германија) не можеше да го сопре „летот“ на Превц. Словенецот повторно го чуваше најдоброто за крај, изведувајќи монструозен скок од 152,5 метри во финалната серија. Со вкупно 293 поени, тој го декласираше второпласираниот Рен Никаидо од Јапонија за дури 31,7 поени разлика.
Доминација каква што ретко се гледа
Ова беше 11-та победа за Превц оваа сезона и негов 17-ти подиум. Тој веќе има победи на „Четирите скокалници“ и Светското првенство во летање, а неговата предност во генералниот пласман за Големиот кристален глобус сега изнесува огромни 625 поени пред Рјоју Кобајаши, кој заврши дури на 18-тото место.
„Едноставно уживам и се забавувам, а денес и условите беа на моја страна. Супер среќен сум што коцките се поклопија во вистинско време. Ова е резултат на напорна работа во последните неколку сезони“, изјави скромниот Превц по победата.
Германците слават подиум, Никаидо со скок на денот
Радоста на домашната публика ја донесе Филип Рајмунд, кој го освои третото место со скокови од 142,5 и 139,5 метри. Ова е враќање во форма за Германецот кој се мачеше со болест на почетокот на 2026 година. Второто место му припадна на Јапонецот Рен Никаидо, кој иако беше седми по првата серија, со феноменален втор скок (исто така 152,5 метри) стигна до среброто.
Фокусот се сели во Милано и Кортина
Сите очи сега се вперени кон Зимските олимписки игри 2026. Превц најави дека оди таму без притисок, но со јасна цел.
„Секако дека има притисок на Олимпијадата, но мислам дека ќе биде многу забавно. Одам таму да уживам и да направам шоу за гледачите. Се надевам дека заедно со сестра ми Ника ќе постигнеме нешто посебно“, заклучи лидерот во Светскиот куп.
