Фудбалската федерација на Македонија (ФФМ) денеска претстави значаен чекор во својата дигитална иднина, објавувајќи стратешка соработка со иновативната шведска платформа FANZEAL. Ова партнерство е најавено како клучна можност за проширување на дигиталните и комерцијалните потенцијали на македонскиот фудбал.
На официјалната промоција присуствуваа претседателот на ФФМ, Масар Омерагиќ, фудбалската легенда Горан Пандев, како и извршниот директор на FANZEAL, Самуел Арнал, и Дејан Вељковиќ.
Омерагиќ: Стратешка можност за нови спонзори
Претседателот Омерагиќ ја истакна стратегиската важност на оваа соработка, која треба да го подигне нивото на интеракција со фановите и да привлече нови комерцијални партнери.
„Нашата цел е јасна – да создадеме ново ниво на интеракција со навивачите, да ја зголемиме видливоста на нашиот бренд и да го отвориме фудбалот за нови можности. FANZEAL токму тоа го овозможува: директна поврзаност со публиката, персонализирани содржини и платформа која им нуди повисока вредност и на навивачите и на нашите партнери“, истакна Омерагиќ.
Тој ја нагласи и комерцијалната димензија: „Ова партнерство е стратегиска можност за зголемување на нашите комерцијални потенцијали. Со FANZEAL ја отвораме вратата за нови спонзори, за креативни кампањи, за подобра активација на постојните партнери и за нови брендови што сакаат да бидат дел од македонската фудбалска приказна“.
Пандев: Чекор напред за приближување до навивачите
Горан Пандев е избран да биде едно од заштитните лица на македонската платформа FANZEAL, истакнувајќи го нејзиниот потенцијал за поврзување.
„FANZEAL е чекор напред. Платформа што ќе ја донесе репрезентацијата, лигите, клубовите и младите таленти да бидат поблиску до нашите навивачи. Платформата е простор за интеракција, за емоција, за нови содржини и нови партнерства кои ќе му помогнат на нашиот фудбал да расте“, изјави Пандев.
Извршниот директор на FANZEAL, Самуел Арнал, потврди дека целта на платформата е да го модернизира фудбалското искуство и да отвори простор за иновативни комерцијални модели.
ФФМ официјално ја презентираше платформата пред своите постојни и потенцијални комерцијални партнери, најавувајќи ги клучните функционалности и потенцијалот за унапредување на навивачкото искуство.
