Војна до истребување: ФИФА го обвини синдикатот на играчи за “уцена”, тие возвратија, “Инфантино мисли дека е Бог!”
Односите помеѓу Светската фудбалска федерација (ФИФА) и глобалниот синдикат на играчи (ФИФПро) ескалираа до точка на вриење, претворајќи се во отворена војна со меѓусебни обвинувања за “уцена”, “автократија” и недостаток на финансиска транспарентност. Овој конфликт, кој се случува далеку од очите на јавноста, ја открива грдата битка за моќ, пари и за иднината на фудбалот.
ФИФА возвраќа на ударот: “Вие сте уценувачи, објавете ги вашите финансии!”
По серијата критики од ФИФПро, ФИФА излезе со жестоко официјално соопштение во кое го обвини синдикатот на играчи за “уцена” и водење на “вештачки ПР-битки”.
“Наместо да се вклучат во конструктивен дијалог, раководството на ФИФПро избра пат на јавна конфронтација, со цел да ги зачува сопствените лични позиции и интереси”, се вели во соопштението.
ФИФА отиде и чекор понатаму, предизвикувајќи го ФИФПро на транспарентност, нешто што предизвика потсмев на социјалните мрежи, со оглед на корупциската историја на светската куќа на фудбалот.
“Бидејќи ФИФПро е заинтересиран за добро владеење, можеби би сакале да ги објават сопствените статути и годишни финансиски извештаи. Да бидеме јасни: не можете да проповедате транспарентност додека работите во тајност”, порачаа од ФИФА. Оваа изјава беше дочекана со коментари како: “Садот му вели на котлето црно” и “ФИФА знае по нешто за финансиска транспарентност”.
Одговорот на ФИФПро: “Инфантино е автократ кој мисли дека е Бог”
Од друга страна, ФИФПро, предводен од новиот претседател Серџо Марки, не остана должен. Во ексклузивно интервју за “The Athletic”, Марки изјави дека “автократијата на претседателот на ФИФА, Џани Инфантино” е најголемата пречка за синдикатот.
ФИФПро ја обвинува ФИФА дека со својот бизнис модел, кој вклучува пренатрупан календар и натпревари во екстремни услови (како што беше Светското клупско првенство), директно го загрозува здравјето на играчите.
“Пренатрупаниот календар, недостатокот на одмор и непочитувањето на социјалните права на играчите, за жал, станаа столбови на бизнис моделот на ФИФА”, се вели во нивното соопштение.
Анализа: Дали Инфантино треба да почне да слуша?
Според анализата на Мет Слејтер од “The Athletic”, овој конфликт е поинаков од сите досега. “Едно е да се бориш со лигите или со агентите, но да влезеш во војна со ѕвездите на шоуто, со нашите херои… дали е тоа паметно?”, прашува тој.
Оваа јавна војна е уште еден доказ дека на ФИФА, како организација, ѝ се потребни длабоки и суштински реформи. Спротивно на тоа, УЕФА како организација е далеку подобро менаџирана. Како што ние во Спортска Станица веруваме и што е објаснето во нашиот “White Paper”, спортот мора да биде пред бизнисот.
Доколку оваа ситуација ескалира и играчите почнат со бојкоти, може да стане многу грдо. Можеби е време Инфантино да престане со ПР-триковите и да почне да слуша. Особено тоа.
