Легендарниот почесен претседател на Баерн Минхен, Ули Хенес, повторно го привлече вниманието на фудбалската јавност со остра критика упатена кон поранешниот тренер на Баварците и актуелен селектор на Англија, Томас Тухел.
Гостувајќи во подкастот „Auf eine weiß-blaue Tasse“, Хенес направи директна споредба помеѓу работата на Тухел и актуелниот тренер Винсент Компани, притоа откривајќи неколку неверојатни и по малку бизарни детали од соблекувалната на Баерн.
Најголемо чудење предизвика анегдотата поврзана со дефанзивецот Јосип Станишиќ. Иако репрезентативецот на Хрватска е роден во Минхен и целиот живот го поминал во Германија и во школата на Баерн, Тухел очигледно не бил запознаен со тој факт.
„Еднаш го праша Станишиќ дали знае да зборува германски, иако момчето е родено овде! Тоа се работи кои едноставно се неприфатливи и ја покажуваат големата разлика,“ изјави Хенес.
Токму под водство на Тухел, Станишиќ не добиваше шанса и беше испратен на позајмица во Баер Леверкузен, каде што одигра клучна улога во освојувањето на титулата, ставајќи крај на 11-годишната доминација на Баерн. Сега, под водство на Компани, Станишиќ повторно е важна алка во тимот.
„Тухел никогаш не ја бараше вината во себе“
Хенес не застана тука. Тој остро го критикуваше Тухел за неговиот однос кон играчите и постојаните јавни барања за нови трансфери.
„Кога тимот играше лошо, тој никогаш не се преиспитуваше себеси; секогаш играчите беа виновни: ‘Овој десен бек не функционира, а и Кимих не е многу добар играч’. За Рајан Гравенберх (кој сега блеска во Ливерпул) велеше: ‘Не можам воопшто да го искористам’,“ се присети 74-годишниот Хенес.
За разлика од него, Хенес има само пофални зборови за Винсент Компани. Според него, Белгиецот ги прави сите играчи подобри и никогаш на прес-конференција не се пожалил дека му недостасуваат нови засилувања на одредени позиции, нешто што беше секојдневие кај Тухел.
Овие изјави на Хенес предизвикаа лавина реакции на социјалните мрежи и форумите, каде навивачите на Баерн се согласуваат дека мандатот на Тухел оставил длабоки лузни, но истовремено се прашуваат зошто управата воопшто го ангажираше ако комуникацијата била толку лоша.
