По оставката на претседателот Габриеле Гравина, италијанскиот фудбал денеска остана без уште една своја икона. Џанлуиџи Буфон официјално потврди дека се повлекува од функцијата шеф на делегацијата на италијанската репрезентација.
Легендарниот голман, кој ја извршуваше оваа улога од летото 2023 година, одлучи да ги следи чекорите на Гравина и да го напушти „бродот кој тоне“ по шокантната елиминација од Босна и Херцеговина во баражот за СП 2026.
Буфон понудил оставка уште во Зеница
Во долгата објава на својот Инстаграм профил, Буфон откри дека својата одлука ја донел веднаш по завршувањето на пенал-рулетот во Зеница во вторникот навечер. Сепак, тој бил замолен да почека со официјалното соопштение додека не се разјасни статусот на претседателот на федерацијата.
„Ја понудив мојата оставка веднаш по поразот од Босна. Ова е тежок момент за сите нас кои го сакаме овој дрес. Сметам дека е чесно да се повлечам во моментот кога почнува нов циклус за италијанскиот фудбал“, порача Буфон.
Следен на листата е Гатузо?
Со заминувањето на Гравина и Буфон, италијанските медиуми веќе најавуваат дека е прашање на часови кога и селекторот Џенаро Гатузо ќе го стори истото. Иако Гравина пред да си замине му даде поддршка на Гатузо, „Рино“ се соочува со огромен притисок од јавноста и политичките структури во Рим, кои бараат „чистка“ на сите нивоа.
Италија во моментов е нација без фудбалско раководство, без шеф на делегација и со селектор чија иднина е на „стаклени нозе“. По три пропуштени Мундијали во низа, „Азурите“ влегуваат во можеби најтемниот период во својата богата историја.
Прочитајте ја неговата објава во целост:
„Да поднесам оставка веднаш по завршувањето на натпреварот против Босна беше итен чин, нешто што дојде длабоко од мене. Тоа беше спонтано како и солзите што ме болат во срцето, а за кои знам дека ги споделувам со сите вас. Бев замолен да почекам додека сите не добијат време за рефлексија. Сега кога претседателот Гравина реши да се повлече, се чувствувам слободен да го направам она што сметам дека е одговорен потег.
И покрај моето искрено верување дека изградивме многу на полето на тимскиот дух со Рино Гатузо и сите мои соработници во многу краткиот период што го имавме, главната цел беше да ја вратиме Италија на Светското првенство. И не успеавме. Правилно е да им оставам на оние што ќе ме следат самите да ја изберат личноста за која сметаат дека е најдобра да ја пополни мојата улога.
Да се претставува националниот тим за мене е чест и страст што ме обзема уште откако бев момче. Се обидов да ја извршам мојата улога вложувајќи ја целата моја енергија, сакајќи сите сектори да бидат поврзани – да бидам врска за дијалог и синергија помеѓу младинските тимови, па сè до У21 репрезентацијата. Сакав да го редефинираме начинот на кој се развиваат талентите за иднината на сениорскиот тим.
Побарав и добив вклучување на неколку клучни, искусни фигури кои ги носат тие неопходни промени со среднорочна и долгорочна визија. Ова е затоа што верувам во политиката на меритократија. Ќе остане на оние што се надлежни да ја проценат мудроста на тие избори. Сè чувам во моето срце, со благодарност за привилегијата и научените лекции, дури и ако ова е болен епилог. Forza Azzurri sempre“.
