Второто коло на Мастерсот во Индијан Велс донесе дијаметрално спротивни натпревари за двајцата најголеми фаворити. Светскиот рекет број еден, Карлос Алкараз, продолжи со својата застрашувачка форма во 2026 година, додека Новак Ѓоковиќ покажа дека петнеделната пауза по финалето во Мелбурн оставила трага врз неговата игра.
Алкараз е „машина“: 13-0 во 2026 година!
Шпанецот Карлос Алкараз изгледаше недопирливо во дуелот против поранешниот број три, Григор Димитров, совладувајќи го со 6-2 и 6-3. За само 66 минути, Алкараз ја запиша својата 13-та победа во исто толку мечеви оваа сезона. Иако ветерот на стадионот правеше проблеми, 22-годишниот Шпанец доминираше со насмевка на лицето.
„Генерално сум многу среќен со работите што ги направив денес. Толку многу сакам да бидам тука, мислам дека затоа играм толку релаксирано, смирено и едноставно уживам“, изјави Алкараз, кој по триумфите во Мелбурн и Доха, сега брка трета титула во Калифорнија.
Ѓоковиќ низ „иглини уши“ до третото коло
За разлика од Шпанецот, Новак Ѓоковиќ мораше добро да се испоти. Во својот прв натпревар по пет недели пауза, тој го совлада Камил Мајхжак со 4-6, 6-1 и 6-2. Пољакот го шокираше Новак во првиот сет, но Србинот успеа да се „ресетира“, а мечот го одбележа и неверојатна размена од 40 удари на почетокот на третиот сет.
„Камил е многу солиден играч, ги има сите удари во книгата и не се плашеше да ја напаѓа топката рано. Одигра неверојатен прв сет. Јас морав да се ресетирам и да почнам подобро да ја чувствувам топката. Тешко е да ја најдеш својата ’А-игра’ веднаш на почетокот на турнирот, па затоа сум само среќен што го надминав овој предизвик“, истакна Ѓоковиќ.
Дрејпер ја започна одбраната на трофејот
Британската надеж Џек Дрејпер успешно ја започна мисијата за одбрана на титулата со победа над Роберто Баутиста Агут (3-6, 6-3, 6-2). По тешката повреда на раката која го оддалечи од терените во вториот дел од 2025 година, Дрејпер изгледа подготвено за нов голем резултат.
„Да излезам на терен и да играм на ова ниво по повредата што ја имав… навистина сум горд на тоа“, изјави четвртиот тенисер во светот.
Сензација на денот: Фонсека го „собори“ Хачанов
Најголемото изненадување го приреди младиот Бразилец Жоао Фонсека, кој спаси две меч-топки и го елиминираше 16-от носител Карен Хачанов со 4-6, 7-6, 6-4. Исто така, поранешниот шампион Тејлор Фриц успеа да слави против Јакоб Фернли, иако пропушти четири меч-топки во вториот сет.
