Македонското алпско скијање има нова хероина која поставува граници што досега изгледаа недостижни. Младата Јана Атанасовска оствари неверојатен резултат на ФИС слалом трките во Телфс, Австрија, соборувајќи го сопствениот и националниот рекорд во женска конкуренција.
Најдобар резултат во историјата на Македонија
Јана во првата трка во Телфс го освои високото 4-то место, но она што е уште позначајно се нејзините нови 26.41 ФИС поени. Ова е нејзин личен рекорд, но воедно и најдобар женски резултат во историјата на македонското скијање. Колку за илустрација, Јана претходно го држеше рекордот со 30.56 поени, што значи дека овој напредок е огромен чекор напред кон светската елита.
Дека не станува збор за случајност, Јана потврди и во втората трка истиот ден, каде го освои 6-то место (30.78 поени), покажувајќи завидна континуираност во силна меѓународна конкуренција.
Со фокус кон Милано Кортина 2026
Овие успеси доаѓаат во вистински момент. Со веќе три старта во Светскиот куп и злато на ФИС трката во Вајнебене, Јана Атанасовска е главниот македонски адут за претстојните Зимски олимписки игри во Милано Кортина.
Под водство на нејзиниот тренер Александар Атанасовски – Чаве, Јана е подготвена да ги нападне дисциплините слалом и велеслалом на олимписките патеки, докажувајќи дека македонското знаме заслужува да се вее високо меѓу најдобрите светски скијачки нации.
