Преговорите за продолжување на договорот меѓу Душан Влаховиќ и Јувентус доживеаја комплетен колапс во средата, што значи дека српскиот напаѓач дефинитивно ќе го напушти клубот како слободен агент по истекот на обврските на 30 јуни. Познатиот италијански медиум „Тутоспорт“ открива дека финалниот состанок завршил со сериозни тензии и лутина од страна на челниците на „старата дама“ поради едно конкретно прашање поставено од страна на Србинот.
„Зошто да бидам платен исто колку и Дејвид?“
Управата на Јувентус останала шокирана од ставот на Влаховиќ, кој директно се споредил со канадската ѕвезда на тимот. Напаѓачот одбил да ги прифати новите економски услови, сметајќи дека неговиот статус заслужува многу повисока сума од онаа што му била понудена.
„Зошто јас би бил платен исто колку и Дејвид?“ – гласело прашањето на Влаховиќ кое комплетно ги прекинало преговорите и ставило точка на неговата ера во Торино.
Финансискиот јаз кој донесе раздор:
Финансискиот јаз кој го донесе крајниот раздор всушност започна од огромната разлика во очекувањата и бројките. Во последната година од својот договор во Торино, Влаховиќ заработуваше фантастични 12 милиони евра по сезона заедно со одредени бонуси. Јувентус за новата соработка му понуди драстично намалување на 6 милиони евра плус додатоци, што е идентична плата како онаа на канадската ѕвезда Џонатан Дејвид.
Сепак, барањето на српскиот репрезентативец било фиксни 8 милиони евра по сезона заедно со дополнителни бонуси. Раководството на „бјанконерите“ категорично одбило да попушти пред овие барања бидејќи во клубот веќе е поставен строг платен лимит од максимални 7 милиони евра годишно, сума која во моментов во Торино ја заработува единствено Кенан Јилдиз.
Кјелини потврди: Наполи е премногу „краток“, Влаховиќ се сели во европски гигант
Неуспехот во преговорите во средата навечер официјално го потврди и директорот на Јувентус, Џорџо Кјелини. Тој навести дека напаѓачот најверојатно ќе се пресели во странство, бидејќи во моментов ниту еден клуб од италијанската Серија А не е во состојба да ги покрие неговите високи финансиски барања за плата.
Иако екипата на Наполи во изминатиот период остварила конкретни дискусии со менаџерскиот тим на Влаховиќ, јасно е дека тимот од Неапол нема економска моќ да парира на понудите надвор од Италија. Според информациите на „Тутоспорт“, веднаш по веста за колапсот на преговорите, три европски гиганти со огромна финансиска моќ тргнуваат во офанзива по неговиот потпис, а тоа се Баерн Минхен, Атлетико Мадрид и Челси.
