Иако Далас Маверикс зад себе имаат сезона за заборав, нивната нова суперѕвезда Купер Флег се погрижи оваа година да остане запишана во историските книги на најсилната лига во светот. 19-годишниот феномен официјално е прогласен за „Дебитант на годината“ (Rookie of the Year) за сезоната 2025/26, победувајќи во една од најтесните и највозбудливите трки во поновата историја.
Историска доминација на тинејџерот од Далас
Флег стана првиот дебитант по Мајкл Џордан (1984/85) кој успеал да го предводи својот тим во поени, скокови, асистенции и украдени топки. И покрај тоа што Маверикс завршија со скор 26-56, индивидуалниот учинок на Флег беше ништо помалку од застрашувачки. Тој ја заврши сезоната со просек од 21.0 поени, 5.4 скокови и 4.5 асистенции по натпревар.
Клучниот момент кој веројатно ја прекрши трката се случи во претпоследниот викенд од регуларниот дел, кога Флег постигна неверојатни 96 поени на само два натпревари. Токму тогаш тој влезе во историјата како првиот тинејџер кој постигнал 51 поен на еден НБА натпревар (против Орландо), соборувајќи го сопствениот рекорд од 49 поени поставен претходно во сезоната.
Братска битка со Кон Кнупел
Трката беше неверојатно тесна до самиот крај. Флег го победи својот поранешен соиграч од универзитетот Дјук, Кон Кнупел, со само 26 поени разлика во гласањето. Кнупел имаше извонредна сезона во Шарлот Хорнетс, станувајќи првиот дебитант во историјата кој ја предводел лигата во постигнати тројки (273).
„Го следев Кон секоја вечер. Тој ми е како брат, имаме посебна врска и секогаш ќе бидеме тука еден за друг, но конкуренцијата на теренот беше мотив повеќе за двајцата“, изјави Флег по објавувањето на наградата.
Досегашни добитници на НБА наградите за 2026:
- Одбранбен играч на годината: Виктор Вембањама (Сан Антонио)
- Clutch играч на годината: Шај Гилџес-Александер (Оклахома Сити)
- Шестти играч на годината: Келдон Џонсон (Сан Антонио)
- Играч кој најмногу напредувал: Никил Александер-Вокер (Атланта)
- Награда за спортски дух: Дерик Вајт (Бостон)
Трката за МВП наградата сè уште трае, а главни кандидати се Никола Јокиќ, Виктор Вембањама и Шај Гилџес-Александер од редовите на шампионот од 2025 година, Оклахома Сити Тандер.
