Македонската ракометна репрезентација ги започнува клучните подготовки пред најважниот предизвик сезонава – баражот за пласман на Светското првенство. Првата и единствена станица на овој пат е пријателскиот натпревар против селекцијата на Австрија, кој ќе се одигра на 21 март (сабота) во Брегенц, со почеток во 18:00 часот.
За селекторот Кирил Лазаров, ова гостување не е само обичен тест, туку „филтер“ низ кој мора да поминат новите тактички замисли и ракометарите кои допрва треба да ја докажат својата вредност во националниот дрес. Благодарение на пласманот на претходното Европско првенство, Македонија го избегна првиот бараж-циклус, што му овозможи на Лазаров малку „порелаксирано“ да пристапи кон овој натпревар, но со јасна цел.
Австрија како огледало за силните противници
Изборот на противникот не е случаен. Австрија во последната година покажа дека може да им парира на светските велесили, а Лазаров смета дека токму ваков силен противник на гостински терен е идеален за ментална подготовка.
„Избравме силен тим на гостински терен затоа што првиот натпревар од баражот го играме надвор од дома. Австрија правеше проблеми на многу посилни репрезентации од нас и на ЕП и на минатиот Мундијал, па затоа ова ќе биде одлична проверка. Сакаме да победиме, но резултатот нема да биде во прв план – ќе пробаме варијанти што планираме да ги користиме во мај“, истакна селекторот.
Поглед кон баражот: Украина или Словачка?
Македонија сè уште го чека својот противник за мундијалскиот билет, кој ќе биде познат по двомечот помеѓу Украина и Словачка. Иако Лазаров ги смета Украинците за фаворити „на хартија“, тој предупредува дека двете селекции играат дијаметрално различен ракомет.
Најголемиот предизвик за нашите ракометари ќе биде новата улога, бидејќи Македонија во овој бараж ќе влезе како фаворит. „Не сме навикнати на таа улога, но наше е да се подготвиме квалитетно. Најважно од сè е да останеме здрави, бидејќи до мај има уште многу натпревари во клубовите“, заклучи Лазаров.
Натпреварот во Брегенц ќе биде последната шанса за „рисовите“ да ги „наместат нишаните“ пред одлучувачките 120 минути во мај, кои треба да ни ја донесат визата за уште еден голем ракометен собир.
