Дали воопшто остана рекорд кој Леброн Џејмс не го поседува? Синоќа во Орландо, „Кралот“ официјално стапна на теренот по 1.612-ти пат во регуларниот дел од сезоната, со што го престигна легендарниот центар на Бостон, Роберт Периш, и стана осамен лидер на вечната листа по бројот на одиграни натпревари во НБА лигата.
Ова достигнување е само уште една потврда за неговата нереална долговечност. Леброн моментално ја игра својата 23-та сезона, со што веќе го поправи рекордот на Винс Картер. За да разберете колку долго трае оваа доминација: дури 79 кошаркари кои играа во НБА оваа сезона не биле ниту родени кога Леброн дебитираше во лигата на 29 октомври 2003 година.
„Статистиката само се случува“
Иако бројките се застрашувачки, Леброн вели дека никогаш не играл за рекорди.
„Не е како да запишувам работи во тетратка и да велам: ’Ќе го срушам овој, па оној рекорд‘. Тоа едноставно се случи. Овој рекорд не беше на мојата листа со желби кога почнав, но чувството е навистина кул“, изјави Џејмс по историскиот натпревар.
Што сè поседува Леброн во својата „ризница“?
Листата на рекорди кои ги држи Џејмс изгледа како научна фантастика:
- Најмногу поени: 43.229 (Карим Абдул-Џабар е втор со 38.387).
- Најмногу минути: Над 60.600 одиграни минути.
- Најмногу All-Star и All-NBA селекции: 22, односно 21 (недостижно за било кој друг).
- Плејоф доминација: Има преку 8.000 поени во доигрувањето, додека никој друг нема ниту 6.000.
Може ли да стигне уште некого?
Иако е прв во речиси сè што е клучно, Леброн следната сезона (ако продолжи да игра) би можел да напредува на уште неколку листи:
- Асистенции: Моментално е четврти, но следната година би можел да ги престигне Џејсон Кид и Крис Пол.
- Украдени топки: Шестти е на листата, но Мајкл Џордан (4-ти) и Гери Пејтон (5-ти) му се во „дострел“.
- Трипл-дабл учинок: Петти е со 124, а Меџик Џонсон му бега само 14 натпревари.
Додека неговиот соиграч Остин Ривс се шегува дека Леброн секој ден измислува нови статистики, како на пример „најмногу носени патики“ или „најмногу искористени врвки“, реалноста е дека Џејмс ја подигна границата толку високо, што веројатно ќе поминат децении пред некој воопшто да се приближи до неговите бројки.
