Најновата информација од Италија носи барем малку мир во спортската јавност. По денешниот застрашувачки пад на олимпискиот спуст, Линдзи Вон (41) веќе е успешно оперирана во болницата „Ка Фончело“ во Тревизо. Олимписката шампионка заработила фрактура на левата нога, а хируршкиот зафат бил неопходен за стабилизирање на коската, на истата онаа нога на која пред само девет дена ги скина и лигаментите (ACL).
Од медицинскиот тим на САД потврдија дека Линдзи е во стабилна состојба и под постојан надзор на врвни американски и италијански лекари. Иако нејзиниот олимписки сон заврши на најсуров можен начин, нејзиниот тренер Аксел Лунд Свиндал откри дека Линдзи веќе почнала да покажува зошто е шампионка: „Ми кажаа дека од хеликоптерот навивала за своите колешки додека трката продолжувала“.
Ретроспектива на ужасот: Како патеката „Олимпија деле Тофане“ стана кобна
Иако пред малку повеќе од една недела ја шокираше јавноста со признанието дека нејзиниот преден вкрстен лигамент е целосно скинат, Линдзи Вон одлучи да ѝ пркоси на медицината. Со специјална заштита на коленото и натчовечка волја, таа се појави на стартот на својата последна Олимпијада. Како 13-та натпреварувачка, таа излета од стартната позиција со својата препознатлива агресивност, решена по секоја цена да се збогува со спортот под свои услови.
Сепак, по само 13 секунди возење, на првиот голем скок, нејзиниот сон се претвори во кошмар. Линдзи со рамото и ски-металот закачи една од портите во воздухот, што ја исфрли од рамнотежа и ја направи немоќна при слетувањето. Вон со целото тело удри во ледената патека и почна неконтролирано да се тркала низ падината, додека илјадниците навивачи останаа во нем молк. Ужасот стана уште поголем кога низ звучниците на патеката се слушнаа нејзините крици на болка кои го парализираа целиот аудиториум.
По речиси 20-минутна драма и итна интервенција на медицинските тимови на самиот снег, мораше да биде повикана хеликоптерска евакуација. Додека леталото полетуваше кон Тревизо, илјадници фанови со громогласен аплауз ја испратија „Кралицата на Кортина“, свесни дека веројатно сведочат на последните моменти од една од најголемите кариери во историјата.
LINDSEY VONN CRASH! Lindsey Vonn, 41, suffered a frightening crash just 13 seconds into her downhill run and was airlifted off the side of the mountain by helicopter about 10 minutes later.
— Breaking911 (@Breaking911) February 8, 2026
pic.twitter.com/HWZjZRTw0C
Злато за САД во сенка на трагедијата
Иронијата на судбината сакаше златото да заврши токму кај нејзината тимска колешка Бризи Џонсон, која стана првата Американка по Линдзи Вон (Ванкувер 2010) со олимписка титула во спуст. Џонсон не ја ни прослави победата, туку со главата во рацете го гледаше падот на својата менторка.
„Срцето ме боли за неа. Линдзи е во друга димензија, чест ми е што моето име е до нејзиното, но таа заслужуваше подобар крај“, изјави новата шампионка низ солзи.
По 84 победи во Светскиот куп и безброј операции, овој пад најверојатно ја става последната точка на нејзината кариера. Дури и за „железната Линдзи“, овој предизвик може да биде преголем за уште едно враќање.
